سەرچاوەیەك لە دیوانی ئەنجوومەنی وەزیرانی عێراق رای گەیاند كە هیچ نیەتێك نییە بۆ ئەوەی بۆ سبەی سێشەم پشووی سەرتاسەری لە عێراق رابگەیەنرێت، ئەمە لەكاتێكدایە هەر یەك لە كەربەلا و كەركووك لە پێناو چاكتر بەڕێوەچوونی پڕۆسەی سەرژمێرییەوە سبەیان كردووە بە پشوو.
ئەمڕۆ دووشەم، 18ی تشرینی دووەمی 2024، سەرچاوەیەكی بەرپرس و باڵا لە حكوومەتی عێراق بە میدیا عێراقییەكانی راگەیاندووە، هیچ راسپاردە و رێنوێنییەك و نیەتێك تا ئێستە بوونی نییە بۆ ئەوەی سبەی بكرێت بە پشووی فەرمی، هاوكات ئاماژەیشی كرد كە پشووەكە تەنیا رۆژانی چوارشەم و پێنجشەمی ئەم هەفتەیە دەبێت.
سەرچاوەكە ئەوەیشی گوت، حكوومەتە خۆجێیەكان دەتوانن بڕیار لەسەر پشوو یا دەوامی خۆیان بدەن بە گوێرەی سروشتی پارێزگاكەیان و پێویستی بۆ ئاسانكاری پڕۆسەی سەرژمێری و باشتر بەڕێوەچوونی رێكارەكانی سەرژمێری.
جێگەی ئاماژەیە، هەر یەك لە پارێزگاكانی كەركووك و كەربەلا سبەی سێشەمیان كرد بە پشووی فەرمی، ئەمەیش لە پێناو ئەوەی پرۆسەی سەرژمێری لەو پارێزگایانە باشتر بەڕێوەبچێت و كارئاسانی زیاتر بۆ هاووڵاتییان بكەن.
وەڵام بدەوه