گوتەبێژی حكوومەتی هەرێم رای گەیاند، پێش 15ی ئەم مانگە پارەی مووچە بۆ مانگی هەشت دەگات، بە گەیشتنیشی دەست بە دابەشكردنی دەكرێت.
ئەمڕۆ چوارشەم چواری ئەیلوولی 2024، پێشەوا هەورامی گوتەبێژی حكوومەتی هەرێم راگەیاند، بەر لە ناوەڕاستی ئەم مانگە پارە بۆ مووچەی مانگی "ئاب" هەشت دەگات.
ئەم لێدوانەی گوتەبێژی حكوومەتی هەرێم دوای ئەوە دێت كە رۆژی دووشەمی ئەم هەفتەیە لیستی مووچەی مووچەخۆرانی تەواوی كوردستانی بڵاو كردەوە و سبەی كۆتایی بە دابەشكردنی مووچەی مانگی تەمووز دێت.
شایەنی باسە شەوی یەكشەم لە ماڵی شاخەوان عەبدوڵا جێگری سەرۆكی پەرلەمانی عێراق، كۆبوونەوەیەك ئەنجام درا لەبارەی مووچە و بودجە و كێشەكانی تری نێوان حكوومەتی هەرێم و فیدراڵ، بڕیار درا پەرلەمانتارانی كورد لە بەغدا لە هەموو حزبە جیاجیاكان بەیەكەوە كار بۆ چارەسەركردنی كێشەی مووچە بكەن، هەموویان بەیەكەوە پێوەندییان لەگەڵ وەزارەتی دارایی فیدراڵ هەبێت تا بتوانن ئەو روونكردنەوانە بدەن كە لە لایەن هەرێمی كوردستانەوە هاتوون و هاوكات بڕیاریش درا كوردەكان رۆڵی خۆیان لە بەغدا ببینن، بۆ چارەسەركردنی مووچەی مانگی حەوت و هەشت.
وەڵام بدەوه