ئاماژەكانی كەشناسی نیشانی دەدەن كە دووبارە بەرزبوونەوە لە پلەكانی گەرما روودەدەن و گەرمای تاقەتپڕووكێن تا كۆتایی ئەم مانگە بەردەوامی دەبێت.
ئەمڕۆ چوارشەم 21ی ئاب، سادق عەتییە شارەزای كەشناسیی عێراقی لە بڵاوكراوەیەكی فەیسبووكدا رای گەیاندووە كە پێشبینی دەكرێت ئەمشەو رێژەی شێ دووبارە روو لە بەرزبوونەوە بكات لە بەسرە و میسان و زیقار، كاریگەریی بای رۆژهەڵاتی باشووریش لەسەر تەواوی پارێزگا و شارەكانی تری عێراق دەردەكەوێت.
زیاتر هاتووە، سبەی كاتەكانی نیوەڕۆ خێرایی با بەرەو جێگیری و هێوربوونەوە دەڕوات؛ هاوكات بەردەوامیشی دەبێت لە باشووری رۆژهەڵات و شارەكانی خوارووی عێراق، كە ئەمەیش دەبێتە كاریگەری لەسەر بەرزبوونەوەی پلەكانی گەرما تا دەگاتە 50 پلەی سەدی، بە تایبەت لە شارەكانی باشوور و ناوەڕاست لە نیوەڕۆی رۆژی شەموودا.
بەپێی پێشبینیی سادق عەتییە، كاریگەریی ئەم شەپۆلە گەرمییە تاقەتپڕووكێنە تا سێشەمی داهاتوو بەردەوامیی دەبێت، بەڵام لە باشوور و خوارووی عێراق تا كۆتایی مانگ بەردەوامیی دەبێت.
وەڵام بدەوه