سوودانی بە سیاسەتی بەغدا بەرامبەر ھەرێم رازی نییە.رافد عەتوانی، شرۆڤەكاری سیاسی دەڵێت، هێزە سیاسییەكانی چوارچێوەی هاوئاهەنگی دەیانەوێ سوودانی بەخواستی ئەوان بجووڵێتەوە، ئەو هێوربوونەوەشی لە سەردەمی حكوومەتەكەی هاتە كایەوە، بە ویستی هەرسێ پێكهاتەی سوننە و كورد و شیعەیە، بەڵام دوای لادانی حەلبووسی، دیار بوو كە سوودانی بەوە رازی نییە، جیا لەوە لە بارەی مووچەی فەرمانبەرانی هەرێم، بۆیەش دووپاتی كردەوە كە لە بودجەدا شتێك بە ناوی مووچەی فەرمانبەرانی هەرێم نییە و ئەوەی هەیە پشكی هەرێمی كوردستانە.
روونی كردەوە، سوودانی هەوڵ دەدات پەیامێك بۆ هەردوو پێكهاتەی سوننە و كورد رەوانە بكات، بەوەی ئەو لەو كێشە و هەنگاوە سیاسییانە رازی نییە، بۆیە ماوە ماوە هەوڵ دەدات چاوی بە كەسایەتییەكانی سوننە و كورد بكەوێت، لەوكاتەی ئەو هێوركردنەوەی سوودانی بەرانبەر بە سوننە و كورد، رەنگە وا بكات هەندێك لایەنی سیاسی دۆخەكە لە سەردەمی حكوومەتی سوودانی تێك بدەن، لەوانە پەلەكردن لە كردنەوەی دۆسیەی گەندەڵییەكانی حكوومەتەكەی، كە مەبەست لێی رووبەرووبوونەوەی گەندەڵی نییە ئەوەندەی مەبەست لێی گوشار خستنە سەر سوودانیە، بۆ گەڕاندنەوەی بۆ سیاسەتەكانی چوارچێوەی هاوئاهەنگی.
عەتوانی ئاماژە دەكات، ئەگەرچی رێككەوتنێكی سیاسی هەیە و سوودانی دەیەوێ هاوسەنگییەك بۆ بەردەوامبوونی حكوومەتەكەی دروست بكات، بەڵام ئەگەر لە سیاسەتی رازیكردنی كورد و سوننە بەردەوام بێت، لە بەرانبەر ئەو كودەتایەی لەلایەن چوارچێوەی هاوئاهەنگی بۆ لاوازكردنی كورد و سوننە كراوە، ئەگەری هەیە هەندێك لایەن كە دەیانەوێ نێوانی هەرسێ پێكهاتە بشێوێنن، لە رۆژانی داهاتوو گوشاری زیاتر بخەنە سەر حكوومەتی سوودانی.
وەڵام بدەوه