زێر بەشێوەیەکی بەرچاو دابەزی

بەهای زێڕ بەردەوامە لە دابەزین و زێڕینگەرێكیش ئاشكرای دەكات، دوو ئەگەر لەبەردەم بەهای زێڕدایە.

دانا وەرتی، خاوەنی زێڕنگەریی ئازوورا لە هەولێر، ڕاگەیاند: "هۆكاری دابەزینی زێڕ دوو خاڵە، یەكیان بەرزیی هێزی دۆلارە، ئەوەی دیكەشیان كێشەی نێوان كۆماری و دیموكراتەكانی ئەمریكایە لەسەر سەقفی قەرزەكان.

نرخی هەر ئۆسنێک زێڕ هەزار و 954 دۆلارە، لە كاتێكدا لە ماوەكانی كەمی ڕابردوودا نزیكی دوو هەزار دۆلار بوو.

ئاماژەی بەوەش دا: ئەگەر ئەو كێشەیە چارەسەر نەكرێت ئەوە بەهای زێڕ زۆر بەرز دەبێتەوە، ئەگەریش چارەسەر بكرێت ئەوە زۆر دادەبەزێت.

ئەمڕۆ سێشەممە، بەهای زێڕی عەیار 21 بە 420 هەزار دینارە و ڕۆژی 22ی 5 هەر مسقاڵێك زێڕی عەیار 21 بە 425 هەزار دینار بوو.

ئەمڕۆ بەهای زێڕ بەم شێوەیە:

مسقاڵێک زێڕ عەیار 24=475,000

مسقاڵێک زێڕ عەیار 22=435,000

مسقاڵێک زێڕ عەیار 21=420,000

مسقاڵێک زێڕعەیار 18=355,000

دانا وەرتی ئەوەشی خستە ڕوو: جۆ بایدن ئاماژەی بەوە داوە گەشبینن لەسەر كێشەی سەفقی قەرزەكان دەگەنە ئەنجامێكی باش، ئەوەش كاریگەریی لەسەر بەهای زێڕ كردووە.

ئاماژەی بەوەش كرد: یەكێكی دیكەش لە هۆكارەكای دابەزینی زێڕ لە ناوخۆی هەرێمی كوردستان بۆ دابەزینی بەهای دۆلارە.

جەختیشی كردەوە : "تەنیا لەو مانگەدا بۆ هەر مسقاڵێك زێڕ 25 بۆ 35 هەزار دینار دابەزیوە.

ئازاد عومەر، گوتەبێژی زێڕینگەرانی سلێمانی ڕایگەیاند: پێشبینی دەکرێت تاوەكوو مانگی تەمووزی ئەمساڵ نرخەکان لەم نێوەندەدا بمێنێنەوە.