گۆڕانکارییەک لە خشتەی مووچەدا کرا

هەزاران فەرمانبەر و مامۆستا و مووچەخۆر ئاگادار دەکرێنەوە، ئەمڕۆ مووچەکانیان لە رێگەی ئامێرەكانی راكێشانی پارەوە وەربگرن.

ئەمڕۆ سێشەممە 17/12/2024، كە لە تیمی پرۆژەی (هەژماری من)ەوە بە دەستی گەیشتووە، ئەمڕۆ مووچەی بەشێک لە مووچەخۆرانی هەرێمی کوردستان بە شێوازی دیجیتاڵی لە ڕێگەی كارت و ئامێرەكانی راكێشانی پارەوە لە سەرجەم پارێزگاکانی هەرێمی کوردستان دابەش دەکرێت.

بەشێکی پەروەردەکان لە خشتەی دارایی، مووچەکان ڕۆژی شەممە 21/12/2204 بوو، بەڵام ئەمڕۆ 17/12/2024 مووچەكانیان دابەش دەكرێت و لە ڕێگەی هەژماری بانکیی بەشداربوان و بە کورتەنامەیەک ئاگادار دەکرێنەوە.

بۆ مووچەی مانگی 10، زیاتر لە 191 هەزار مووچەخۆر و فەرمانبەر، مووچەکانیان لە ڕێگەی (هەژماری من)ەوە وەردەگرن.

دوێنێ دووشەممە 16/12/2024، وەزارەتی دارایی و ئابووری، لە ڕاگەیاندراوێكدا، خشتەی مووچەی مانگی 10ی بڵاو كردەوە و ئاماژەی بەوە دا، ڕۆژی سێشەممە 17/12/2024 دەست بە دابەشكردنی مووچەی مانگی 10 دەكرێت، ڕۆژی دووشەممە 23/12/2024 كۆتایی دێت.

وەزارەتی دارایی ئەوەشی خستبووە ڕوو: "ئەو بڕەپارەیەی کە لە تەرخانکراوەکانی پشکی هەرێمی كوردستان بۆ پڕکردنەوەی کورتهێنانی مووچە بڕیاری گواستنەوە (مناقلة)ی لەسەر دراوە، هێشتا تەمویلەکەی نەخراوەتە سەر هەژماری بانکیی وەزارەتی دارایی."

لە ڕاگەیاندراوەكەدا ڕوونیش كرابووەوە: "تەمویلی مووچەی مانگی 11 کە لەلایەن وەزارەتی دارایی عێراقەوە بڕیاری خەرجکردنی دراوە، بە هەمان شێوە هێشتا نەخراوەتە سەر هەژماری بانکیمان."