نرخی نەوت بەشێوەیەکی بەرچاو بەرزبووەوە

به‌هۆی هێرشه‌كه‌ی شه‌وی رابردووی هه‌ردوو وڵاتی ئه‌مه‌ریكا و به‌ریتانیا بۆ سه‌ر پێگه‌ی حوسییه‌كان له‌ وڵاتی یه‌مه‌ن، نرخی نه‌وت به‌شێوه‌یه‌كی به‌رچاو و پێوانه‌یی به‌رز بووه‌وه‌ به‌شێوه‌یه‌ك كه‌ نرخی هه‌ر به‌رمیلێك گه‌یشته‌ سه‌رووی 80 دۆلاری ئه‌مه‌ریكی.

ئه‌مڕۆ هه‌ینی نرخی هه‌ر به‌رمیلێك نه‌وتی برێنت به‌ ڕێژه‌ی 3.46% به‌رز بووه‌وه‌ و گه‌یشته‌ 80.09 دۆلار، ئه‌مه‌ش بۆ یه‌كه‌مجاره‌ نرخی نه‌وت به‌م ڕێژه‌یه‌ و بۆ ئه‌م ئاسته له‌ 27ی كانوونی یه‌كه‌می ساڵی رابردووه‌وه‌‌ به‌رزبێته‌وه‌.

به‌هه‌مانشێوه‌ نرخی نه‌وتی خاوی تێكساسی ئه‌مه‌ریكیش به‌ ڕێژه‌ی 3.64% به‌رز بووه‌وه‌ و هه‌ر به‌رمیلێك نرخه‌كه‌ی بووه‌ 74.66 دۆلار.

شه‌وی ڕابردوو ئه‌مه‌ریكا و به‌ریتانیا له‌ رێگه‌ی فڕۆكه‌ جه‌نگی و كه‌شتییه‌ جه‌نگییه‌كانیانه‌وه‌ هێرشێكی چڕیان كرده‌ سه‌ر پێگه‌ی حوسییه‌كان له‌ وڵاتی یه‌مه‌ن به‌هۆی ئه‌و په‌لاماردانانه‌ی كه‌ له‌ ماوه‌ی ڕابردوودا كردبوویانه‌ سه‌ر كه‌شتییه‌ بازرگانییه‌كان له‌ ده‌ریای سوور.