لە درێژەی کاردانەوەکانی سووتاندنی قورئان لەلایەن هاووڵاتییەکی عێراقی لە سوێد، سەرۆکوەزیرانی سوێد رایگەیاند، پێویستە خەڵک دان بەخۆیاندا بگرن. هەروەها لەبارەی سووتاندنی قورئانیشەوە گوتی، "یاساییە، بەڵام کارێکی نەگونجاوە.
رۆژی هەینی 30ـی حوزەیرانی 2023، ئۆلف کریستێرسۆن، سەرۆکوەزیرانی سوێد لە کۆنفڕانسێکی رۆژنامەڤانیدا رایگەیاند: "زۆر قورسە کە بتوانم بڵێم دەرئەنجامی ئەوە چی دەبێت؛ پێموایە کە خەڵکێکی زۆر هۆکاری ئەوەیان هەیە کە کاردانەوەیان هەبێت.
سەرۆکوەزیرانی سوێد باسی لە کاردانەوەکان بەرامبەر بە سووتاندنی قورئان کرد لە دەرەوەی سوێد و باسی لە ئەگەری هێرشکردنە سەر باڵیۆزخانەکانی سوێد کرد و رایگەیاند: "بەدڵنیاییەوە ئەوە شتێکی قبووڵکراو نییە کە خەڵک لە وڵاتانی دەرەوەی سوێد بەشێوەیەکی نایاسایی خۆیان بگەیێننە نێو باڵیۆزخانەی سوێد.
ئەو گوتانەی سەرۆکوەزیرانی سوێد دوای ئەوە هات کە خۆپێشاندەران لە بەغدا خۆیان گەیاندە نێو باڵیۆزخانەی سوێد لە بەغدا.
لەبارەی سووتاندنی قورئان، سەرۆکوەزیرانی سوێد دەڵێت: "تەنیا لەبەر ئەوەی ئەنجامدانی هەندێک شت یاسایین، مانای ئەوەی نییە گونجاو بێت.
پەنابەرێکی عێراقی لە سوێد بە ناوی سەلوان مۆمیکا، لە یەکەمین رۆژی جەژنی قوربان، لە بەردەم گەورەترین مزگەوتی ستۆکهۆڵم، کۆپیێکی قورئانی پیرۆزی سووتاند.
سووتاندنی ئەو کۆپییەی قورئانی پیرۆز لە سەرانسەری وڵاتانی زۆرینە موسڵمانان و چەند وڵاتێکی دیکەش ناڕەزایی و سەرکۆنەکردنی بەدوای خۆیدا هێنا.
ڤلادیمیر پووتین، سەرۆکی رووسیا رایگەیاند، "ئەوە بۆ موسڵمانان شتێكی پیرۆزە و بۆ ئایینەکانی دیکەش پیرۆزە. لە وڵاتی ئێمە بێڕێزی بە قورئان تاوانە." هەروەها ڤێدانت پاتێل، جێگری گوتەبێژی وەزارەتی دەرەوەی ئەمریکا رایگەیاند، "بەردەوام رامانگەیاندووە کە سووتاندنی کتێبی ئایینی بێڕێزی و ئازاربەخشە.
حکومەتی عێراق بە تووندی سەرکۆنەی ئەو کارەی کرد و هۆشداری لە ئەنجامە نەرێنییەکانی دا و گوتی: "ئەم کردەوانە رەنگدانەوەی گیانێکی شەڕانگێزیی رقاوین." سەرۆکى ئەنجوومەنى باڵاى دادوەرى عێراقیش داوای کرد رێوشوێنە یاساییەکان بگرنەبەر، بۆئەوەى بەگوێرەى یاسا داواى گەڕاندنەوەى ئەو کۆچبەرە بکەن.
لە هەرێمی کوردستانیش، سەرۆک مەسعود بارزانی لە پەیامێکدا رایگەیاند: "كردەی ناڕەوای سووتاندنی قورئانی پیرۆز بە هیچ شێوەیەك ناچێتە چوارچێوەی ئازادیی ڕادەربڕین و هیچ پاساوێك هەڵناگرێت. ئەمە برینداركردنی هەست و سۆزی تێكڕای موسڵمانانی جیهانە و زۆر بە تووندی سەركۆنەی دەكەین."
وەڵام بدەوه