ئەردۆغان هەڕەشەی توند لە یۆنان دەکات

سەرۆککۆماری تورکیا ئێوارەی یەکشەممە 11-12-2022 لە پارێزگای سامسون رایگەیاند، بەرهەمهێنانی مووشەکی تایفون لەلایەن تورکیاوە یۆنانی تۆقاندووە و ئەوان دەڵێن دەگاتە ئەسینا. دەشڵێت، یۆنان "بەم شێوەیە بەردەوام بن، بە مووشەکی تایفون لێتان دەدەین."
 
رەجەب تەیب ئەردۆغان، سەرۆککۆماری تورکیا رۆژی یەکشەممە 11-12-2022 لە پارێزگای سامسون بەشداریی لە کۆنسێرتێکی تایبەت کرد و وەڵامی پرسیاری بەشێک لە بەشداربووانی دایەوە. ئەردۆغان باسی لەوە کرد کە ئێستا تورکیا مووشەک دروستدەکات و "بەمەش یۆنان تۆقیوە و دەڵێت، تورکیا لە ئەسینا دەدات". سەرۆککۆماری تورکیا لەوبارەیەوە بە یۆنانی گوت، "بێگومان وا بڕوات لێتان دەدەین."
 
ئەردۆغان دەڵێت، "دەستمان بە دروستکردنی مووشەک کردووە. بێگومان ئەمە یۆنان دەتۆقێنێت. هەر کە دەڵێیت تایفون، یۆنان دەتۆقێت. دەڵێن لە ئەسینا دەدات. بێگومان لێی دەدات. ئەگەر تۆ دانەنیشیت و لە ئەمریکاوە بۆ دوورگەکان، بتەوێت لێرە و لەوێ شتێک دەستبخەیت، وڵاتێکی وەکو تورکیا هەرمێ کۆناکاتەوە و پێویستە شتێک بکات."
 
سەرۆککۆماری تورکیا گلەیی لە ئەمریکا کرد و گوتی، "ئەمریکا 4 بۆ 5 هەزار بارهەڵگری پڕ لە چەک و پێویستیی سەربازی دەنێرێتە باکووری سووریا. سەرەڕای ئەوەی چەندین جار ئەمەم بە ئەوان گوتووە، هیچ منەتیان نییە. گوتم ببوورن سەرەڕای ئەوەی ئێمە لە ناتۆ بەیەکەوەین، ئێوە ئەم هەڵەیە دەرهەق بە ئێمە دەکەن و دەچنە ریزی رێکخراوی تیرۆریستی. کەواتە خۆمان ناوکی خۆمان دەبڕین، هیچ چارەیەکی دیکە نییە."
 
ئەمەش لە کاتێکدایە کە تورکیا لە ماوەی رابردوودا لەگەڵ یۆنان لەسەر دوورگەکان و چەند بابەتێکی دیکە کەوتنە گرژییەوە. جگە لەمەش، تورکیا بەردەوام هەڕەشەی ئەنجامدانی ئۆپەراسیۆنی زەمینی بۆسەر رۆژئاوای کوردستان و سووریا دەکات.