ئەمریکا نەرمی نواند

بەرپرسێکی باڵای ئێران بە ئاژانسی ڕۆیتەرزی ڕاگەیاندووە کە ئەمریکا نەرمی نواندووە بۆ ئەوەی بەرنامە ئەتۆمییەکەی تاران بە شێوەیەکی سنووردار بەردەوام بێت، لە بەرامبەریشدا ئێران مەرجی کۆتاییهێنان بە جەنگ و کردنەوەی گەرووی هورمزی خستووەتە ڕوو.
​ئەمڕۆ دووشەممە، 18ـی 5ـی 2026، ئاژانسی هەواڵی ڕۆیتەرز لە زاری سەرچاوەیەکی باڵای ئێرانییەوە ئاشکرای کرد کە ئەمریکا نەرمی نواندووە لەبەرامبەر ئەوەی ڕێگە بە ئێران بدات بەردەوام بێت لەسەر چالاکییە ئەتۆمییە ئاشتیخوازانەکانی خۆی، بەو مەرجەی بە شێوەیەکی سنووردار و لەژێر چاودێریی وردی ئاژانسی نێودەوڵەتیی وزەی ئەتۆمدا بێت.
​بە وتەی سەرچاوە ئێرانییەکە، تاوەکو ئێستا واشنتن تەنیا ڕەزامەندیی لەسەر ئازادکردنی یەک لەسەر چواری پارە بلۆککراوەکانی ئێران نیشان داوە، ئەمەش بەپێی خشتەیەکی کاتی و بە شێوەی قۆناغ بە قۆناغ جێبەجێ دەکرێت. هەر بۆیە، ئێران داوای لە ئەمریکا کردووە کە پێداچوونەوە بەو دوو هەڵوێستەیدا بکات و نەرمیی زیاتر بنوێنێت.
​لەلایەکی دیکەوە، تاران لە پێشنیازە نوێیەکەیدا بۆ واشنتن، جارێکی دیکە سەرنجی خستووەتە سەر چەند پرسێکی هەستیار و داوای کۆتاییهێنان بە جەنگ، کردنەوەی گەرووی هورمز و هەڵگرتنی سزاکانی سەر هاتوچۆی دەریایی کردووە.
لەگەڵ هەموو ئەمانەشدا، ئەو پرسە سەرەکییەی کە کێشمەکێشی زۆری لەسەرە و بریتییە لە تەواوی بەرنامە ئەتۆمییەکەی ئێران و پرسی پیتاندنی یۆرانیۆم، یەکلایی نەکراوەتەوە و بۆ گەڕەکانی دیکەی دانوستانەکان دوا خراوە.