زەنگی دەسپێکردنەوەی جەنگ لێدرا

فەرماندەیی ناوەندیی ئەمریکا (سێنتکۆم) دەڵێت، هێزەکانی ئەمریکا بۆ هەر پلانێکی نائاسایی ناوچەکە ئامادەن، گەمارۆ دەریاییەکەش بۆ سەر ئێران بەردەوام دەبێت. هەوڵە دیپلۆماسییەکان لە ڕێگەی نێوەندگیرە ناوچەیی و نێودەوڵەتییەوە بەردەوامن بۆ ڕێگریکردن لە دووبارە سەرهەڵدانەوەی شەڕ، بەڵام نیگەرانییەکان لە ئەگەری داڕمانی ئاگربەستی نێوان ئەمریکا و ئێران ڕووی لە زیادبوون کردووە.
هەرچەندە ئەمریکا جەخت لەسەر بەردەوامبوونی ڕێڕەوی دیپلۆماسی دەکاتەوە، بەڵام سەرۆکی ئەمریکا پەیامێکی نوێی هۆشداریی ئاراستەی ئێران کردووە و تێدا داوا دەکات پەلە بکەن و بەرەو ڕێککەوتن هەنگاو بنێنن.
 تیم هۆکینز، وتەبێژی سێنتکۆم لە چاوپێکەوتنێکدا ڕایگەیاند، واشنتن لە نزیکەوە چاودێری هەموو ئەو شتانە دەکات کە ئێرانییەکان لە گەرووی هورمز ئەنجامی دەدەن.
 گەمارۆ دەریاییەکەی ئەمریکا بۆ سەر ئێران بەردەوام دەبێت، چونکە تاران گەرووەکەی وەک چەکێک بۆ هەڕەشەکردن لە ئازادی کەشتیوانی بەکارهێناوە.  لەبارەی کاریگەری ئۆپەراسیۆنی ئەمریکا بۆ سەر ئێران وتەبێژی سێنتکۆم دەڵێت، واشنتن ئەو ئامانجە سەربازیانەی کە لە سەرەتا داینابوو بەدەستیهێناوە و تاڕادەیەکی زۆر توانا سەربازییەکانی ئێران لەناوبراون. وانای ئێران بۆ بوون بە هەڕەشە ئیتر وەک جاران نییە.