ترەمپ مەرجی کۆتایی بۆ ئێران راگەیاند

دۆناڵد ترەمپ، سەرۆکی ویلایەتە یەکگرتووەکانی ئەمەریکا ڕایدەگەیەنێت؛ لارییان نییە لە هەڵپەساردنی بەرنامە ئەتۆمییەکەی ئێران بۆ ماوەی ٢٠ ساڵ، بەو مەرجەی تاران پابەندبوونێکی ڕاستەقینە نیشان بدات. هاوکات جەخت لەوە دەکاتەوە کە توانا سەربازییەکانی ئەو وڵاتەیان لەناوبردووە.
لە میانی گەڕانەوەیدا لە وڵاتی چین، دۆناڵد ترەمپ لە لێدوانێکدا بۆ ڕۆژنامەنووسان ئاماژەی بە دوایین پێشهاتەکانی پەیوەست بە گرژییەکانی نێوان واشنتۆن و تاران کرد و ڕایگەیاند: "ئێمە توانا سەربازییەکانی ئێرانمان لەناوبردووە و کۆتاییمان بە سەرکردەکانی ڕیزی یەکەم تا سێیەمی ئەو وڵاتە هێناوە."
سەرۆکی ئەمەریکا ئەو ڕاپۆرتانەی ڕەتکردەوە کە باس لەوە دەکەن ئێران هێشتا ٪٨٠ـی توانا موشەکییەکانی پاراستووە، بە پاساوی ئەوەی زانیارییەکانی ئەو ڕاپۆرتانە دوورن لە ڕاستییەوە. لە هەمان کاتدا هۆشدارییەکی توندی دایە تاران و وتی: "دەتوانین تەنها لە ماوەی دوو ڕۆژدا تەواوی وێستگەکانی کارەبا لە ئێران لەناو ببەین."