ئەمریکا هاتە دەنگ لەسەر وەڵامی ئێران

ئەمڕۆ ئێران لە رێگەی پاكستانەوە وەڵامی پێشنیازێكی ئەمەریكا بۆ وەستانی شەڕ دایەوە، باڵوێزی ئەمەریكا لە نەتەوە یەكگرتووەكان دووپاتی كردەوە كە وەڵامی ئێرانیان بەدەست گەیشتووە و خەریكی تاوتوێكردنین، سەبارەت بە گەرووی هورمز گوتی، ئێران ناتوانێت لەو رێگەوە ئابووریی دنیا بە بارمتە بگرێت.
مایك واڵتز باڵوێزی ئەمەریكا لە نەتەوە یەكگرتووەكان گوتی، وەڵامی ئێرانمان لە رێگەی پاكستانەوە بەدەست گەیشت و واشنتن خەریكی تاوتوێكردنیەتی، بەر لە گەڕانەوە بۆ شەڕ سەرۆك ترەمپ هەموو بوارێك بۆ رێگەچارەی دیپلۆماسی دەرەخسێنێت، دووپاتی كردەوە، ئێران ناتوانێت لە رێگەی داخستنی گەرووی هورمزەوە ئابووریی دنیا بە بارمتە بگرێت.
دوای راگەیاندنی رادەستكردنی وەڵامی تاران بۆ واشنتن لە رێگەی ئیسلام ئابادەوە، میدیا فەرمییەكانی ئێران دووپاتیان كردەوە كە وەڵامەكەی ئێران بابەتی بەرنامە ئەتۆمییەكەی ئێرانی پشتگوێ خستووە و سەرنجی خستووەتە سەر كۆتاهێنان بەو شەڕەی لە ناوچەكە هەیە، ئاژانسی "ئێرنا"ی فەرمی گوتی، هەوڵەكانی ئێران بۆ مسۆگەركردنی ئاسایشی هاتوچۆی دەریاییە لە گەرووی هورمز، بەر لە دەست پێكردنی هەر دانوستانێك لەبارەی بابەتە هەستیارەكان، لەوانە بەرنامەی ئەتۆمیی ئێران.
ئەگەرچی تا ئێستە هیچ زانیارییەك لەبارەی وەڵامەكەی ئێران بۆ پێشنیازەكەی ئەمەریكا بە تەواوەتی بڵاو نەكراوەتەوە، بەتایبەتی لە لایەن میدیاكانی ئێرانەوە، بەڵام راپۆرتە رۆژنامەوانییە ئەمەریكییەكان باسی ئەوە دەكەن كە پێشنیازەكە باسی كردنەوەی گەرووی هورمز  و لابردنی گەمارۆ دەریاییەكەی ئەمەریكا بۆ سەر بەندەرەكانی ئێران دەكات، جیا لە دیاریكردنی ماوەی 30 رۆژ بۆ دانوستان بەمەبەستی گەیشتن بە رێككەوتنێكی فرەوانتر.