کەناڵێکی ئەمەریکی ئاشکرای کرد، فەرماندەی فەرماندەییی ناوەندیی ئەمەریکا (سێنتکۆم)، درەنگانی شەوی ڕابردوو بژاردە سەربازییەکانی دژی ئێرانی خستووەتە بەردەم دۆناڵد ترەمپ، یەکێک لە سیناریۆکانیش بریتییە لە "ڕووخاندنی ڕژێم".
ئەمڕۆ هەینی 27ی شوبات، کەناڵی "ABC News"ـی ئەمەریکی بڵاوی کردەوە، ئەدمیراڵ براد کوپەر فەرماندەی فەرماندەییی ناوەندی، بە ئامادەبوونی جەنەڕاڵ دان کین سەرۆکی دەستەی ئەرکانی هاوبەش و ڕاوێژکارە باڵاکان، کۆبوونەوەیەکیان لەگەڵ سەرۆک ترەمپ کردووە و بژاردەکانیان تاوتوێ کردووە.
بەپێی کەناڵەکە، ژمارەیەک لە بەرپرسانی کۆماری و ئیدارەی ترەمپ، بیرۆکەی ئەوەیان خستووەتە ڕوو کە "ئیسرائیل لێدانەکە ئەنجام بدات لەبری ئەوەی ئەمەریکا دەستپێشخەری بکات"، دواتر ئەگەر ئێران وەڵامی دایەوە، ئەمەریکا بە پاساوی بەرگریکردن لە ئیسرائیل دەچێتە ناو جەنگەکەوە.
سەرچاوەکان ئاماژەیان بەوە داوە، ترەمپ تووشی بێهیوایی بووە لەوەی تاران مل بدات بۆ وەستاندنی پیتاندنی یۆرانیۆم و بەرنامە مووشەکییەکەی، بۆیە بژاردەی ئۆپەراسیۆنی هاوبەشی ئەمەریکا و ئیسرائیل هێشتا لەسەر مێزە.
سیناریۆکان چین؟
١. لێدانی سنووردار بۆ سەر سەکۆی مووشەکە بالیستییەکان و بنکە ئەتۆمییەکان وەک هۆشداری.
٢. ئۆپەراسیۆنێکی فراوان بۆ لاوازکردنی سیستمی بەرگریی ئاسمانیی ئێران.
٣. هەڵمەتێکی سەربازیی بەردەوام کە بگاتە ئاستی "هەوڵدان بۆ ڕووخاندنی ڕژێم"، کە ئەمەیان ڕەنگە چەندان هەفتە بخایەنێت.
وەڵام بدەوه