سەرۆكی فڕەنسا لە پەیامێكدا رای گەیاند، ئەمڕۆ لەگەڵ ئەحمەد شەرع، قسەی كردووە و نیگەرانیی خۆی لە گرژییەكان دەربڕیوە. دەشڵێت، "ئاگربەستێكی هەمیشەیی پێویستە، هەروەها دەبێت ڕێككەوتنێك لەسەر یەكخستنی هێزەكانی سووریای دیموكرات (هەسەدە) لەگەڵ هێزەكانی دەوڵەتی سووریادا بكرێت".
ئیمانوێل ماكرۆن سەرۆكی فڕەنسا ڕای گەیاند، ئەم بەیانییە پێوەندییەكی تەلەفۆنی لەگەڵ ئەحمەد شەرع ئەنجام داوە و تێیدا تاوتوێی دۆخی تەناهیی و سیاسی ئەو وڵاتەیان كردووە.
ماكرۆن لە پۆستێكدا ئاشكرای كردووە كە نیگەرانیی قووڵی فڕەنسای بە سەرۆكی سووریا گەیاندووە، لەبارەی زیادبوونی گرژییەكان و بەردەوامی ئەو هێرش و ئۆپراسیۆنانەی لەلایەن دەسەڵاتدارانی سووریاوە ئەنجام دەدرێن.
سەرۆكی فڕەنسا دووپاتیشی لە پێویستی ڕاگەیاندنی ئاگربەستێكی هەمیشەیی و گەیشتن بە ڕێككەوتن، بۆ تێكەڵكردنەوەی هێزەكانی سووریای دیموكرات (هەسەدە) لەگەڵ دامەزراوەكانی دەوڵەتی سووریا، لەسەر بنەمای ئەو ئاڵوگۆڕ و گفتوگۆیانەی لە مانگی ئاداری ڕابردوودا كراون.
وەڵام بدەوه