له ئاستی ناوچه‌یی و هه‌رێمایه‌تی و جیهانیدا، هێرشه‌كانی ئیسرائیل و فه‌له‌ستینییه‌كان بۆ سه‌ر یه‌كدی كاردانه‌وه‌ی جیای لێكه‌وتووه‌ته‌وه. به‌شێك پێیان وایه ئیسرائیل زیاد له راده هێزی بۆ سه‌ركوتی خۆپیشانده‌ران به‌كارهێناوه و به‌شێكیش پێیان وایه ئه‌وه‌ی ئیسرائیل ده‌یكات مافی به‌رگری له خۆ كردنه.
پوخته‌ی هه‌ڵوێسته‌كان:
* به‌ریتانیا
سه‌رۆك وه‌زیران، بۆریس جۆنسۆن، رایگه‌یاند، داوا له ئیسرائیل و فه‌له‌ستینییه‌كان ده‌كه‌ین دان به خۆیاندا بگرن. به‌ریتانیا نیگه‌رانه له‌و كوشتاره‌ی له ریزی مه‌ده‌نییه‌كان ده‌كرێت. پێویسته بارگرژی به په‌له رابگیرێت.
* یه‌كێتی ئه‌وروپا:
شارل میشال، سه‌رۆكی ئه‌نجوومه‌نی ئه‌وروپا رایگه‌یاند، زۆر نیگه‌رانه له په‌ره‌سه‌ندنی توندوتیژی و هێرشی هه‌ڕه‌مه‌كیانه.
* فه‌ره‌نسا:
پاریس رایگه‌یاند، پێویسته ئه‌مه‌ریكا ده‌ستوه‌ردان بكات.
وه‌زیری ده‌ره‌وه‌ی فه‌ره‌نسا بۆ كاروباری ئه‌وروپایی، كلیمان بون، رایگه‌یاند، پێویسته ئه‌وروپا ئاماده‌یی زیاتری هه‌بێت، به‌ڵام ده‌بێت ئه‌مه‌ریكا ده‌ستوه‌ردان بكات.
* ئه‌ڵمانیا:
گوته‌بێژی حكومه‌تی ئه‌ڵمانیا، شتیڤن زایبرت، رایگه‌یاند، ئیسرائیل مافی خۆیه‌تی به رووی ئه‌و هێرشانه بوه‌ستێته‌وه و به‌رگری له خۆكردن مافێكی ره‌وایه.
گوتیشی: ئه‌ڵمانیا به توندی ئیدانه‌ی ئه‌و هێرشه مووشه‌كیانه ده‌كات كه له كه‌رتی غه‌ززه‌وه ده‌كرێنه سه‌ر ئیسرائیل.
هه‌روه‌ها گوتی: ئامانجی ئه‌و هێرشه مووشه‌كیانه‌ی ده‌كرێنه سه‌ر ئیسرائیل، كوشتنی هه‌ڕه‌مه‌كیانه‌ی خه‌ڵكه و پێویسته ئه‌و هێرشانه بوه‌ستێنرێن و هیچ شتێك پاساوی ئه‌و توندوتیژییه نییه.
هه‌ر له‌و باره‌یه‌وه، گوته‌بێژی وه‌زاره‌تی ده‌ره‌وه‌ی ئه‌ڵمانیا، كریستۆڤه‌ر بۆرگر، گوتی: هێرشه‌كانی حه‌ماس نابنه به‌رگری له خۆكردن، به‌ڵام ئیسرائیل مافی خۆیه‌تی به‌رگری له خۆی بكات.
* رووسیا:
سه‌رۆكی رووسیا، ڤلادیمێر پوتن، رایگه‌یاند، له‌گه‌ڵ هاوتا توركه‌كه‌ی قسه‌یان كردووه و نیگه‌رانی خۆی له به‌رده‌وامی شه‌ڕ و زیادبوونی كوژراو و برینداره‌كان ده‌ربڕیوه.
* توركیا:
ره‌جه‌ب ته‌یب ئه‌ردۆغان، به ته‌له‌فۆن له‌گه‌ڵ سه‌رۆكی رووسیا، ڤلادیمێر پوتن رایگه‌یاندووه، پێویسته ده‌ستبه‌جێ توندوتیژییه‌كان بوه‌ستن. پێویسته كۆمه‌ڵگه‌ی نێوده‌وڵه‌تی ده‌رسێكی توند به ئیسرائیل دابدات.
* دادگای تاوانی نێوده‌وڵه‌تی:
داواكاری گشتیی دادگاكه، فاتو بنسودا رایگه‌یاند، زۆر به نیگه‌رانییه‌وه چاودێری هه‌ڵكشانی توندوتیژی له كه‌ناری خۆرئاوا و قودسی خۆرهه‌ڵات و غه‌ززه ده‌كات. ئه‌گه‌ر زۆره تاوانی جه‌نگ ئه‌نجام بدرێن.
* رێكخراوی هاوكاری ئیسلامی:
رێكخراوه‌كه باره‌گای له شاری جدده‌ی سعوودییه‌یه، ئه‌و له به‌یاننامه‌یه‌كدا ئیدانه‌ی هێرشه‌كانی ئیسرائیلی بۆ سه‌ر گه‌لی فه‌له‌ستین كرد. هه‌روه‌ها ئیدانه‌ی ئه‌و ده‌ستدرێژیانه‌ی ئیسرائیلی كرد، كه ده‌یانكاته سه‌ر فه‌له‌ستینییه‌كان و ده‌یه‌وێت ماڵ و موڵكیان به زۆرداری ده‌ستبه‌سه‌ردا بگرێت و جووله‌كه‌ی توندڕه‌وی لێ نیشته‌جێ بكات.
سه‌رچاوه: فرانس پرێس
وەڵام بدەوه