سوپای ڕووسیا بە هاوكاریی كۆریای باكوور، هێرشێكی چڕوپڕی بۆ سەر ناوچەی كۆرسك لە ڕۆژاوای ڕووسیا دەست پێكردووە و دەیەوێت سەربازە ئۆكراینییەكان لەو ناوچەیە دەرپەڕێنێت. ئەمەش بەپێی قسەی فەرماندەی گشتیی سوپای ئۆكرانیا ئەلكساندەر سیرسكی.
ئەمە لە كاتێكدایە كە جەنگی ڕووسیا- ئۆكراینا دەچێتە ساڵی سێیەمەوە و تاكوو ئێستا هەوڵی ئاگربەست و كۆتاییهێنان بە ڕاگرتنی شەڕ سەركەوتوو نەبووە. كۆشكی سپییش ڕایگەیاندووە، هێزەكانی كۆریای باكوور لە ڕیزی پێشەوەی شەڕی ڕووسیا و ئۆكراینادان و لە هێرشكردنە سەر وڵاتەكە بەشدارن.
هەواڵگریی سەربازیی ئۆكراینا ڕایگەیاندووە، ڕۆژی دووشەممە، 30 سەربازی كۆریای باكوور لە ناوچەی كۆرسك لە شەڕدا كوژراون.
ناوچەی كۆرسك دەكەوێتە باشووری ڕۆژاوای ڕووسیا و باكووری ڕۆژهەڵاتی ئۆكراینا، بە ناوچەیەكی گرنگی سنووریی نێوان هەردوو وڵات دادەنرێت.
لە مانگی ئابی 2024، دوای ماوەیەك پێشڕەویی هێزەكانی رووسیا لەناو ئۆكراینا، مۆسكۆ لەناكاو كەوتە بەردەم هێرشێكی ئۆكراینا بۆ ناو خاكەكەی لە ناوچەی كۆرسك، هەزاران سەربازی ئۆكراینی بە تانك و زریپۆشەوە چوونە ناو ئەو ناوچە سنوورییەی ڕووسیا و دەستیان بەسەر دەیان گونددا گرت، تاكوو ئێستاش شەڕ لەو ناوچەیە گەرمە.
وەڵام بدەوه