وەك دووپاتكردنەوەی سووربوونیان لەسەر دروستكردنی هەڕەشە بۆ هاتوچۆی دەریاوانی لە دەریای سوور و زەریای هیندی، ئەمشەو حوسییەكانی یەمەن، كە لە لایەن ئێرانەوە پاڵپشتیی دەكرێن، یە مووشەك و درۆن هێرشیان كردە سەر دوو كەشتیی كە یەكێكیان ئەمەریكییە.
وەك خۆیان لە بەیاننامەیەكدا رایان گەیاند، بە 11 مووشەكی بالیستی و دوو درۆنی بۆمبڕێژكراو هێرشیان كردووەتە سەر كەشتیی هەڵگری نەوتیی ئەمەریكی "ئۆلۆمپیك سبیریت" لە دەریای سوور و راستەوخۆ پێكاویانە.
دووپاتیان كردەوە كە هێرشێكی تریان بە مووشەكێكی باڵدار كردووەتە سەر كەشتی "ST.JOHN "، لە زەریای هیندی و راستەوخۆ ئەویشیان پێكاوە.
شایەنی باسە حوسییەكانی یەمەن وەك هەر میلیشیایەكی تری ئێرانی لە ناوچەكە لە دوای هێرشەكەی حەماس بۆ سەر ئیسرائیل بەر لە ساڵێك، دەستیان بە كردنەئامانجی ئیسرائیل و بەرژەوەندییەكانی كردووە، هاوكات هەڕەشەكی رژدیان بۆ سەر هاتوچۆی دەریایی لە دەریاكانی سوور و عەرەب و زەریای هیندی و گەرووی بابولمەندەب دروست كردووە، ئەوەش وای كردووە چەند جارێك ئەمەریكا و بەریتانیا هێرشیان بكەنە سەر، جیا لەو گورزانەی ئیسرائیل لێیان دەدات.
وەڵام بدەوه