ئەو پۆلە پێشمەرگەو مەدەنیانەی لە رۆژانی رابردوودا دەستی ڕەش و چەپەڵی تیرۆرو لەشکەری تاریکپەرەستان چووە خوێنیانەوە، تەنیا ئاواتیان پاراستنی خاک و کەرامەت و شکۆی نەتەوەیەک بوو.

نەتەوەیەک، بە درێژایی سەت ساڵی رابردوو لە گشت قۆناغەکانی خەبات و بەرخودان و  رووبەروو بوونەوەی زەبروزەنگی داگیرکاران و  فتنەی ناوەخۆو دەرەکیدا، توانیویەتی وەک کێو لەبەردەم شەپۆلی داپڵۆسین و زولم و ستەم و پاکتاوی نەژادیدا رابگرێ و کۆڵ نەدات. 

ساڵەهایە خاکی پاکی ئەم نیشتیمانە بریندارە بە خوێنی رۆڵە بە ئەمەک و دڵسۆزو سەربەرزەکانیەوە ئاو ئەدرێت و  شکۆی ئەپارێرێت. 

جێگەی داخە بە درێژای ئەم مێژووەی تەژی نسکۆو شکست و  هەڵسانەوەو سەرکەوتن و دەسکەوتە، هەمیشە کەسانێکی نامۆ بەم خاکونیشتیمانە بۆ دەست خستنی کۆمەڵە دەسکەوتێکی کاتی و  بڕینەوەی کاڵای نیشتیمان بە باڵای  بەرژەوەندیەکانی بەرتەسکی خۆیان و بیری پۆپۆلیستانەیانەوە، گشت هەوڵ و تەقەلای خۆیان بۆ هەڵتەکاندنی ئینتیمای نیشتیمانی و کرچ و کاڵ کردنەوەی هەستی نەتەوەیی و پیرۆزیەکانەوە خستۆتە گەڕو سڵ لە هیچ ناکەنەوە. 
 
هاندانی و گەرم کردنی لاوو گەنج و خوێندکاران لەم ئان و ساتە پڕ هەستیارەی تیرۆر هەمیسان بەرۆکی نیشتیمانی گرتووەو  تیرۆریستان تەپڵی شەڕو وێرانکاری بە گوێچکەی  رۆڵەکانی نیشتیماندا دەچرپێنن، هیچ پاساواێک هەڵناگرێ و رێک دەچێتە خانەی خزمەت بە نەیارانی کوردستانەوە.