نیشتیمانی هەمووان

نیشتیمانی هەمووان
بەدەر لەوەی چ هێزێک و کام لایەنی سیاسی حوکمی هەرێمی کوردستان دەکات و چۆن دەیکات، ئەم هەرێمە  لە پاڵ زمان و کولتورو دابونەریتمانەوە شوناس و پێناسی نەتەوایەتی و نیشتیمانی هەمووانە. 
ناشێت تووڕەیی، بێزاربوون و گلەیی و ڕق و قین هەڵگرتن هۆکارو پاساوی بە گژداچوونەوەی نیشتیمان و ئومێدخواستن بن بۆ لەناوچوونی.  
  رەخنەو رەخنەگرتن لە سیستەم، لە حوکم، لە شێوازی ئیدارەدان و کاراکتەرە سیاسی و بکەران و سەرلەبەری کایەی سیاسی رۆحی دیموکراسی و فرەیی و کۆمەڵگای هۆشیار و پێشکەوتووە. بەڵام ئومێد خواستن بۆ لەناوچوونی نیشتیمان و خاک و پەنابردن بۆ بێگانە و دەست گرتنی نەیارانی خاک و نەتەوەو سەرکزی، ئەوپەڕی نمەک بە حەرامی و هەست نەکردنە بە هۆشیاری نەتەوەیی و بەرپرسیارەتی نیشتیمانی و خیانەت لە نەوەکانی داهاتوو. 
کوردستان موڵک و نیشتیمانی  هەمووانە و ئەمەش هیچ پەیوەندی بەوەوە نیە کێ و چ لایەنێکی کوردی بەڕێوەدەبات و حوکمی دەکات.