شەڕ دەسپێدەکاتەوە

ده‌سته‌ی په‌خشی ئیسرائیل ڕایگه‌یاند، فه‌رمانده‌یی ناوه‌ندیی ئه‌مریكا نوێنه‌رانی سوپای ئیسرائیلی له‌ ئه‌مریكا ئاگاداركردوه‌ته‌وه‌ خۆیان بۆ ئه‌گه‌ری ده‌ستپێكردنه‌وه‌ی ئۆپه‌راسیۆنه‌ سه‌ربازییه‌كان دژی ئێران ئاماده‌ بكه‌ن.
ده‌سته‌ی په‌خشی ئیسرائیل له‌ زاری به‌رپرسێكی ئه‌مریكییه‌وه‌ بڵاویكرده‌وه‌، په‌یامی ئه‌منی بۆ ئیسرائیل و وڵاتانی كه‌نداو نێردراوه‌ بۆ ئاماده‌باشیی جه‌نگ، كه‌ پێچه‌وانه‌ی لێدوانه‌كانی دۆناڵد تڕه‌مپ سه‌رۆكی ئه‌مریكایه‌ سه‌باره‌ت به‌ نه‌بونی پێویستی هێرشكردنه‌سه‌ر ئێران.
هاوكات ڕۆژنامه‌ی یه‌دیعۆت ئه‌حرۆنۆت ئاشكرایكردوه‌، گادی ئایزنكۆت ڕاسپێردراو بۆ پێكهێنانی حكومه‌تی نوێ هۆشداریی داوه‌ته‌ بنیامین نه‌ته‌نیاهۆ سه‌رۆك وه‌زیرانی كاربه‌ڕێكه‌ر له‌ هێرشی سه‌ربازی، هاوكات سوپای پاسدارانی ئێرانیش پێكانی ڕادارێكی ئه‌مریكای له‌ به‌حره‌ین له‌ وه‌ڵامی سیریكدا ڕاگه‌یاند.
له‌لایه‌كی دیكه‌وه‌ ته‌له‌ڤیزیۆنی فه‌رمیی ئێران بڵاویكرده‌وه‌، تاران ڕۆژی سێشه‌ممه‌ی رابردو شارێكی موشه‌كیی ستراتیژیی نوێی ئاشكرا كردوه‌ به‌ ئاماده‌بونی عه‌لی عه‌بدوڵاهی سه‌رۆكی ئه‌ركانی گشتی و مه‌جید موسه‌وی فه‌رمانده‌ی هێزی ئاسمانیی سوپای پاسداران بۆ هه‌ڵسه‌نگاندنی ئاماده‌باشیی شه‌ڕ.
له‌لایه‌كی دیكه‌شه‌وه‌، به‌رپرسێكی فه‌رمانده‌یی ناوه‌ندیی ئه‌مریكا بۆ ئاژانسی ئه‌نادۆڵ ڕایگه‌یاند، "ئه‌و ڕاپۆرتانه‌ی میدیای ئیسرائیل له‌باره‌ی ئه‌گه‌ری ده‌ستپێكردنه‌وه‌ی ئۆپه‌راسیۆنه‌ سه‌ربازییه‌كان دژی ئێران بڵاویان كردوه‌ته‌وه‌ ته‌نیا پێشبینیی ڕوتن و هیچ گۆڕانكارییه‌كیش له‌ دۆخی هێزه‌كانماندا له‌ ناوچه‌ی ڕۆژهه‌ڵاتی ناوه‌ڕاست نه‌كراوه‌".