چین 1300 باری بۆ ئێران نارد

​ڕۆژنامەی "وۆڵ ستریت جۆرناڵ"ی ئەمریکی ئاشکرای کرد، وەزارەتی بەرگریی ئێران نزیکەی هەزار و ٣٠٠ باری پێکهاتە و پارچەی تەکنەلۆژیی چینی پێگەیشتووە کە بەکارهێنانی دوولایەنەی مەدەنی و سەربازییان هەیە.
​ئەمڕۆ هەینی، 25ـی 9ـی 2026، ڕۆژنامەکە لە ڕاپۆرتێکدا بڵاوی کردەوە، ئەو بارانەی لە کۆمپانیا چینییەکانەوە بۆ تاران نێردراون، کەرەستەی هەستیاری ئەلیکترۆنی، بزوێنەر، و سیستەمی ڕێنیشاندانی زیرەکیان (ناڤیگەیشن) لەخۆگرتووە کە ڕاستەوخۆ لە پیشەسازی و دروستکردنی فڕۆکەی بێفڕۆکەواندا (درۆن) بەکار دەهێنرێن.
​بەگوێرەی زانیارییەکانی ڕاپۆرتەکە، کۆمپانیا چینییەکان هاوکات ئەو پێداویستی و پێکهاتانەشیان بۆ تاران دابین کردووە کە لە پەرەپێدان و بەرهەمهێنانی مووشەکی بالیستیدا بەکاردێن.
​وۆڵ ستریت جۆرناڵ ئاماژەی بەوەش کردووە کە لە سەرەتای ئەمساڵەوە تاوەکو مانگی حوزەیران، کۆمپانیای هێڵی ئاسمانیی "ماهان ئێر"ی ئێرانی پرۆسەی گواستنەوەی ئەو پارچە و کەرەستە چینییانەی لە ڕێگەی ئاسمانییەوە بە شێوەیەکی بەرچاو چڕ کردووەتەوە.