فەرماندەی سوپای پاکستان بەرەو تاران بە ڕێککەوت

عاسم مونیر بەرەو تاران بەڕێککەوت. ئاژانسی فەرمیی هەواڵی ئێران (ئیرنا) بڵاویکردەوە، کە فەرماندەی سوپای پاکستان چەند خولەکێک لەمەوبەر ئیسلام ئابادی بەجێهێشتووە و بڕیارە لە تاران لەگەڵ بەرپرسانی باڵای کۆماری ئیسلامیی ئێران کۆببێتەوە.
سەردانەکەی فەرماندەی سوپای پاکستان پاش ئەوە دێت کە ناوبراو چاوەڕوانی ئەنجامی گفتوگۆکانی وەزیری ناوخۆی وڵاتەکەی دەکرد لە تاران، بەتایبەتی دوای دیدارەکەی لەگەڵ عەباس عێراقچی. بەپێی زانیارییەکان، ئامانجی سەرەکیی سەردانەکەی وەزیری ناوخۆی پاکستان بۆ تاران، گەیشتن بووە بە ڕێککەوتنێک لەسەر چوارچێوە و میکانیزمی دانوستانەکان.
پێشتریش فەرماندەی سوپای پاکستان مەرجی ئەوەی دانابوو کە تەنها لە کاتێکدا گەشتەکەی بۆ تاران ئەنجام دەدات کە فۆڕمی کۆتایی دەقی ڕێککەوتنەکە ئامادەکرابێت، بەپێی نوێترین پێشهاتیش سەرچاوەکان جەخت لەوە دەکەنەوە کە ناوبراو لە ئێستادا لە ڕێگایە بەرەو ئێران.