ئیسرائیل شەڕ هێشتا ماویەتی

هاوكات لەگەڵ ئاڵوگۆڕكردنی پێشنیازەكان بۆ گەیشتن بە وەستانی شەڕ لە نێوان ئەمەریكا و ئێران، بنیامین نەتنیاهۆ سەرۆك وەزیرانی ئیسرائیل دووپاتی كردەوە كە بەهۆی دەستگرتنی تاران بە یۆرانیۆمە پیتێنراوەكەی، هێشتا شەڕی ئێران كۆتایی نەهاتووە.
نەتنیاهۆ لە دیدارێكی تۆڕی "سی بی ئێس" گوتی، پێم وایە شەڕەكە دەستكەوتی باشی هەبوو، بەڵام هێشتا كۆتایی نەهاتووە، چونكە پێویستە یۆرانیۆمە زۆر پیتێنراوەكەی تاران بۆ دەرەوەی ئێران بگوازرێتەوە، هێشتا پێویستە چەند پێگەیەكی پیتاندنی یۆرانیۆم لێك هەڵبوەشێندرێتەوە.
لەبارەی چۆنیەتی بردنەدەرەوەی یۆرانیۆمەكە لە ئێران گوتی، دەچییە ئەوێ و دەیبەیتە دەرەوە، بەشی زۆری ئەركەكانمان لە ئێران بەجێ گەیاندووە، بەڵام هێشتا یۆرانیۆم هەیە و پێویستە كارەكە تەواو بكرێت، باسی ئامرازە سەربازییەكان ناكەم، بەڵام وەك سەرۆك ترەمپ گوتی، دەمەوێ بچمە ئەوێ، پێم وایە دەكرێ ئەوە بە كردەنی ئەنجام بدرێت و كێشە نییە.  
نەتنیاهۆ دووپاتی كردەوە كە ئیسرائیل توانا ئەتۆمییەكانی ئێرانی زۆر لاواز كردووە، جیا لە توانا مووشەكی و میلیشیاكانی لە ناوچەكە، بەڵام هێشتا ئەوانە ماون، بۆیە كارێك ماوە ئەنجامی بدەین، باشترین رێگە بۆ چارەسەركردنی بابەتی یۆرانیۆمەكە، گەیشتنە بە رێككەوتن بۆ دەركردنی لە ئێران، سەرۆكی ئیسرائیل باسی نەكرد ئەگەر رێككەوتن لەوبارەوە نەكرێت چی دەكەن، گوتی، خشتەیەكی كاتی بۆ ئەو كارە دیاری ناكەم، بەڵام ئەو ئەركە زۆر گرنگە.