گۆڕینی ناوی گەرووی هورمز هێڵی سوورە

عەباس عێراقچی، وەزیری دەرەوەی ئێران وەڵامی دۆناڵد ترەمپ، سەرۆکی ئەمریکا دەداتەوە و دەڵێت، گۆڕینی ناوی گەرووی هورمز هێڵی سوورە و هەڵەیەکی گەورەیە. ئەم قسانەی عەباس عێراقچی، وەزیری دەرەوەی ئێران کاردانەوەیە بەرامبەر پۆستێکی دۆناڵد ترەمپ، سەرۆکی ئەمریکا کە ئەمڕۆ پێنجشەممە وێنەیەکی گەرووی هورمزی بڵاوکربوویەوە و  ناوەکەی بۆ "گەرووی ترەمپ" گۆڕی بوو.
وەزیری دەرەوەی ئێران ڕایگەیاند، بەکارهێنانی هەر ناوێکی دیکە لەبری ناوی مێژوویی هورمز، کارێکی "زۆر هەڵە" و "بێبایەخە".
عێراقچی لە پەیامەکەیدا لە تۆڕی کۆمەڵایەتیی ئێکس کە ئەمڕۆ پێنجشەممە بڵاوی کردەوە و هاوکاتە لەگەڵ "ڕۆژی نەتەوەیی کەنداوی فارس"، ئاماژەی بە مێژووی ناوچەکە کرد و ڕایگەیاند: ئەمڕۆ یادکردنەوەی دەرکردنی پورتوگالییەکانە لە گەرووی هورمز کە نزیکەی 400 ساڵ لەمەوبەر ڕوویداوە.
 ئەم ناوچەیە بەشێکی دانەبڕاوە لە مێژوو و سەروەریی ئێران. عێراقچی تیشکی خستە سەر وردەکارییەکی ناو ئەو نەخشەیەی کە ترەمپ دایناوە لە پۆستەکەی و گوتی، "هەرچەندە ترەمپ ناوی گەرووەکەی گۆڕیوە، بەڵام لەسەر نەخشەکە زۆر بە ڕوونی ناوی [کەنداوی فارس]ـی نووسیوە کەواتە ئەمە نیشانەی ئەوەیە تەنانەت ترەمپیش دەزانێت ناوی ڕاستەقینەی ئەو ئاوانە کەنداوی فارسە و تایبەتە بە ئێران.