ئەمەریکا به‌داواكه‌ی ئێران رازی بو

ویلایه‌ته‌ یه‌كگرتوه‌كانی ئەمریکا ئه‌مڕۆ چوارشەممە ره‌زامه‌ندی خۆی ده‌ربڕی به‌ گواستنەوەی دانوستانەکانی نێوان هەردولا لە تورکیاوە بۆ عومان.

ماڵپه‌ڕی ئەکسیۆس لە ڕاپۆرتێکدا بڵاویكرده‌وه‌، ئیدارەی دۆناڵد ترەمپ، سەرۆکی ئەمریکا ڕازی بوە بە داواکاری ئێران بۆ گواستنەوەی دانوستانەکان لە تورکیاوە بۆ عومان و بڕیاره‌ رۆژی هه‌ینی دانوستانه‌كه‌ ده‌ستپێبكات و له‌باره‌ی پرسی ئه‌تۆمی و به‌رنامه‌ موشه‌كییه‌كه‌ی ئێران گفتوگۆ بكرێت.

سه‌رچاوه‌یه‌كی ئاگادار له‌ ئیداره‌ی تره‌مپ ئاماژەی بەوەکردوه‌، ئیدارەی ترەمپ ڕەزامەندی دەربڕیوە لەسەر داواکاری ئێران بۆ گواستنەوەی دانوستانەکان لە تورکیاوە به‌ڵام دانوستانەکان هێشتا بەردەوامن سەبارەت بە بەشداریکردنی وڵاتانی عەرەبی و ئیسلامی لەو دانوستانانەی کە بڕیارە لە عومان بەڕێوەبچن.

تره‌مپ ڕایگەیاندوه‌، ئەمریکا "ئێستا" لەگەڵ ئێران دانوستان دەکات، دوای ئەوەی تاران داوای کردبو کە دانوستانە پلان بۆ داڕێژراوەکان لە تورکیاوە بگوازرێنەوە بۆ عومان و مەوداکانیان کەم بکرێتەوە.

لە لێدوانێکیدا بۆ ڕۆژنامەنووسان لە کۆشکی سپی ، ترەمپ ئامادەنەبو دیاری بکات کە ئەو دانوستانانەی کە بڕیارە لە کۆتایی ئەم هەفتەیەدا ئەنجام بدرێت لە کوێدا ئەنجام دەدرێن.

ماڵپەڕی ئەکسیۆسی ئەمریکی لە زاری دو سەرچاوەی ئاگادارەوە بڵاویکردەوە، ئێران داوای گۆڕانکاری لە شوێنی دانوستانەکانی داهاتوی لەگەڵ ئەمریکا کردوە، کە بڕیارە هەینی بەڕێوەبچێت.