ئێران نەیارەکانی شۆک دەکات

ئەمڕۆ یەکشەممە (2ی تشرینی دووەمی 2025)، مەسعوود پزیشکیان، سەرکۆمارى ئێران دووپاتی کردەوە جارێکی تر دامەزراوە ئەتۆمییەکانیان بەهێزێکی گەورەتر دروست دەکەنەوە، جەختی لەوەش کردەوە سەرجەم چالاکییە ئەتۆمییەکانی بە تەواوی ئاشتیانەن و ئامانجیان دابینکردنی پێداویستییە شارستانییەکان و چارەسەرکردنی کێشەکانی هاووڵاتییانە.

ئەم لێدوانانەى ناوبراو لە میانی کۆبوونەوەیەکیدا لەگەڵ بەڕێوەبەرانی باڵای کەرتی وزەی ئەتۆمی هات، کە تێیدا جەختی لەوە کردەوە "چالاکییە ئەتۆمییەکانمان بۆ چارەسەرکردنی کێشەکانی خەڵک و پرسە کارگێڕییەکان تەرخان کراون".

پزیشکیان گوتی: "دوژمنان هەوڵ دەدەن ئەو بیرۆکەیە بڵاوبکەنەوە کە ئێران هەوڵی بەرهەمهێنانی بۆمبی ئەتۆمی دەدات، لە کاتێکدا ئێمە بەپێی فەتواکانی ڕێبەری شۆڕش (خامەنەیی) بەکارهێنانی چەکی ئەتۆمی بە حەرام دەزانین".

ڕوونیشی کردەوە "زانست لە مێشکی زانایانماندایە، ئەگەر هەر دامەزراوە یان کارگەیەک وێران بکرێت، ئەوا کاریگەریی نابێت، چونکە ئێمە جارێکی تر بەهێزێکی گەورەتر دروستی دەکەینەوە".

لە کاتی ئەو جەنگەی کە لە نێوان ئیسرائیل و ئێراندا لە 13 تا 24ی حوزەیرانی ڕابردوو هەڵگیرسا، سێ دامەزراوە ئەتۆمییە سەرەکییەکەی ئێران لە 22ی هەمان مانگدا لەلایەن ویلایەتە یەکگرتووەکانی ئەمریکاوە کرانە ئامانج و دۆناڵد ترەمپ ڕایگەیاند: پرۆژەى ئەتۆمیی ئێرانمان لەناو برد.