ئەردۆغان باسی چۆنییەتی چەک دانانی پەکەکە دەکات

ئەردۆغان لەبارەی میکانیزمی چەک دانانی پەکەکە دەڵێت، قسە لەگەڵ هەولێر و بەغدا دەکەن. 

رەجەب تەیب ئەردۆغان، سەرۆککۆماری تورکیا رۆژی شەممە، 17ی ئایاری 2025، لە کاتی گەڕانەوەی لە ئەلبانیا، لەنێو فڕۆکە سەبارەت بە چەند پرسێک قسەی بۆ رۆژنامەڤانان کرد.

سەرۆککۆماری تورکیا گوتی: ''سەبارەت بە چۆنییەتی رادەستکردنی چەکەکان، لەگەڵ لایەنە پەیوەندیدارەکانی دراوسێکانمان گفتوگۆ دەکرێت. هەندێک پلان هەن سەبارەت بەوەی حکومەتی بەغدا و ئەربیل (هەولێر) چۆن رۆڵیان لەم پرۆسەیەدا (چەکدانان) دەبێت''.

ئەردۆغان لەبارەی پرۆسەی چارەسەری رایگەیاند: ''ئامانجی کۆتایی تورکیایەکی بی تیرۆر روونە؛ دەبێت چەکەکان بنێژرێن. دەبێت رێکخراوی تیرۆریستی بەتەواوی چەکەکانی دابنێت و بڕیاری خۆهەڵوەشاندەوە جێبەجێ بکات''.

سەرۆککۆماری تورکیا لەبارەی بڕیارەکانی کۆنگرەی پەکەکە گوتی: ''یەکەکانی ئاسایشی وڵاتمان، لەمەودوا چاودێری کار و چالاکییەکانی پەیوەست بە خۆهەڵوەشاندنەوە و رادەستکردنی چەکەکانی رێکخراوەکە (پەکەکە) دەکەن''.