بڕیارە دۆناڵد ترەمپ سەرۆكی ئەمەریكا لە مانگی ئایاری داهاتوو سەردانی هەریەك لە سعوودیە و قەتەڕ و ئیمارات بكات، كە دەبێتە دووەم سەردانی دەرەوەی لەوەتەی لە كۆشكی سپی دەستبەكار بووە لە 20ی كانوونی دووەمی ئەمساڵ.
لەوكاتەی بڕیارە شەممەی داهاتوو ترەمپ بەهۆی كۆچی دوایی پاپا فرانسیس پاپای ڤاتیكان سەردانی ڤاتیكان بكات، لە یەكەم سەردانی بۆ دەرەوەی ئەمەریكا، كارۆلین لیفیت گوتەبێژ بە ناوی كۆشكی سپی بە رۆژنامەوانانی راگەیاند كە سەردانی داهاتووی ترەمپ بۆ هەریەك لە سعوودیە و قەتەڕ و ئیمارات دەبێت لە 13 بۆ 16ی ئارای داهاتوو، ئەو خوازیاری بەهێزكردنی پێوەندییەكانە لەو سەردانەی بۆ رۆژهەڵاتی ناوەڕاست.
لای خۆیەوە ئەمڕۆ سێشەممە سەرۆكی ئەمەریكا رای گەیاند كە فەرمانی بە وەزارەتی بەرگری كردووە بۆ گواستنەوەی هێزی زیاتری سەربازی بۆ رۆژهەڵاتی ناوەڕاست، ئەوەش بۆ زیادكردنی توانا سەربازییە بەرگری و هێرشییەكانی ئەمەریكا لە ناوچەكەدا.
ئەو لە پەیامێك بۆ هەردوو سەرۆكی ئەنجوومەنی نوێنەران و پیران روونی كردەوە، زیادكردنی هێزەكان، بوارەكانی بەرگریی ئاسمانی و مووشەكی دەگرێتەوە بۆ بەهێزكردنی پارێزراویی ئاسایشی ئیسرائیل و بنكە سەربازییەكانی ئەمەریكا لە ناوچەكە.
ترەمپ ئاشكرای كرد كە هێزی زیاتری سەربازی لە رۆژهەڵاتی ناوەڕاست بڵاو كراوەتەوە، ئەو هەنگاوەش لە چوارچێوەی ستراتیجیەتێكی فروانە بۆ مسۆگەریی سەقامگیریی ناوچەكە و پاراستنی بەرژەوەندییەكانی ئەمەریكا و هاوپەیمانەكانی واشنتن.
وەڵام بدەوه