سوپای پاسداران ئامادەی شەڕین

فەرماندەی سوپای پاسدارانی ئێران لە سەروبەندی هەڕەشەكانی ئەمریكا بۆ لێدان لە ئێران، ڕایدەگەیەنێت: دەستپێشخەریی شەڕ ناكەین، بەڵام ئامادەی شەڕین.

ئاژانسی (ئێرنا)ی ئێرانی بڵاوی كردووەتەوە، حوسێن سەلامی، فەرماندەی گشتیی سوپای پاسدارانی ئێران، ئەمڕۆ شەممە، 5ی نیسانی 2025 ڕایگەیاندووە: ئێمە ئامادەی جەنگ و وەڵامدانەوەین، بەڵام دەستپێشخەر نابین لە هێرشكردن و دەستپێكی شەڕ، ئێمە فێر بووین چۆن بەسەر نەیاردا سەركەوین و هیچ هەنگاوێكیش بۆ دواوە هەڵناگرین."

ناوبراو لە كۆبوونەوەی لەگەڵ سەركردە و بەڕێوەبەرانی فەرماندەیی گشتیی سوپای پاسداران ڕایگەیاندووە، "ساڵی ڕابردوو دۆخێكی سەخت و قورسمان بەڕێ كردووە، دوژمنەكانمان هەموو توانا سەربازییەكانیان بەرامبەر ئێمە ڕاگرتووە و هێناویانەتە گۆڕەپانەكە."

ناوبراو دەڵێ: "ئێمە توانایەكی كەڵەكەبووی سەربازییمان پێكەوە ناوە، تاكوو دوژمن بكەینە ئامانج، ئامادەشین بۆ دەرخستنی توانا ڕاستەقینەكانمان، ئەگەر نەیاران بیانەوێ دەستی داخراومان بكەنەوە تاكوو ڕاستییەكە ببینن، ئێمە ئامادەین."

ئەو قسانەی ئەو بەرپرسە سەربازییەی ئێران لە كاتێكدایە كە میدیاكانی جیهان بە گەرمی باس لە ئەگەرەكانی هێرشی ئەمریكا و ئیسرائیل بۆ سەر پێگە و بنكە سەربازی و ئەتۆمییەكانی ئێران دەكەن. كەناڵی 14ی ئیسرائیلی بڵاوی كردووەتەوە، ئیسرائیل هێرشێكی وا گەورە دەكاتە سەر ئێران، كە لە دوای دووەمین جەنگی جیهانییەوە شێوەی نەبووە.

هاوكات دۆناڵد ترەمپ، سەرۆكی ویلایەتە یەكگرتووەكانی ئەمریكا چەند جارێك داوای كردووە ئێران ڕازی بێت بە ڕێككەوتنێكی نوێ لەبارەی وازهێنان لە بەرنامە ئەتۆمییەكەی و دەشڵێ: ئەگەر ئێران ڕازی نەبێ شتی خراپ ڕوو دەدات.