وه‌زیری راگه‌یاندنی حكوومه‌تی یه‌مه‌ن رای گه‌یاند، له هێرشی ئاسمانیی ئه‌مه‌ریكا بۆ سه‌ر حووسییه‌كان، جگه له‌وه‌ی كه ده‌یان فه‌رمانده و به‌رپرسی باڵای حووسییه‌كان كوژراون، له هه‌مان كاتدا ژماره‌یه‌ك پاسداری ئێرانیش له ریزی كوژراوه‌كاندان.
كه‌ناڵی ته‌له‌ڤزیۆنیی یه‌مه‌ن بڵاوی كرده‌وه، هێرشه‌كانی ئه‌مه‌ریكا بۆ سه‌ر پارێزگای حه‌دیده بووه و ئه‌و شوێنه‌ی كرایه ئامانج، له‌لایه‌ن حووسییه‌كانه‌وه ئاماده كرابوو بۆ هێرشكردنه سه‌ر كه‌شتییه بازرگانییه‌كان له ده‌ریای سوور و گه‌رووی بابولمه‌نده‌ب و كه‌نداوی عه‌ده‌ن.
له ماوه‌ی هه‌فته‌ی رابردوودا ئه‌مه‌ریكا چه‌ند هه‌ڵمه‌تێكی ئاسمانیی له دژیی حووسییه‌كانی یه‌مه‌ن جێبه‌جێ كردووه كه له‌لایه‌ن ئێرانه‌وه پاڵپشتی ده‌كرێن.
ئه‌مجاره روون بووه‌ته‌وه كه له ناو ریزه‌كانی حووسییه‌كان، ئه‌ندامانی سوپای پاسدارانیش هه‌ن و ته‌نانه‌ت ژماره‌یه‌كیان كوژراون، ئه‌وه‌یش ده‌یسه‌لمێنێت كه ئێران جگه له پشتگیری و یارمه‌تیدانی حووسییه‌كان، هێزیشی ره‌وانه كردووه.
دۆناڵد تره‌مپ پێشتر هۆشداریی به ئێران دابوو هه‌ر فیشه‌كێك كه له‌لایه‌ن حووسییه‌كانه‌وه به‌رانبه‌ر ئه‌مه‌ریكا بته‌قێنرێت، له‌سه‌ر ئێرانی حیساب ده‌كات.
به‌و سیاسه‌ته‌ی ئێران له یه‌مه‌ن گرتوویه‌ته‌به‌ر و درێژه‌ی پێ داوه، پێده‌چێت هێنده‌ی تر ئه‌مه‌ریكا تووڕه بكات و هه‌ڵوێسته‌كان به كرداری له دژی ئێران بكات.
وەڵام بدەوه