پڕۆژەی هاوبەشی كورديی بۆ دەسەڵاتدارانی سووریا كە لەلایەن هەردوو پارتی سەرەكیی رۆژئاوای كوردستان گەڵاڵە كراوە بڵاو كرایەوە، پڕۆژەكە 25 خاڵە و داوای ئۆتۆنۆمی بۆ كورد دەكەن.
18ی ئادار لە حەسەكەی ڕۆژئاوای كوردستان، هەردوو پارتی سەرەكی رۆژئاوای كوردستان، پارتی یەكێتیی دیموكرات "پەیەدە" و ئەنجوومەنی نیشتمانیی كورد "ئەنەكەسە"، بە ئامادەبوونی مەزڵووم عەبدی فەرماندەی گشتیی هێزەكانی سووریای دیموكرات و سكوت بۆڵز نوێنەری ئەمەریكا بۆ باكور و ڕۆژهەڵاتی سووریا كۆبوونەوە.
لەو كۆبوونەوەدا بڕیار دراوە پڕۆژەیەك وەك دیدگەی هاوبەشی كورد بۆ دەسەڵاتدارانی سووریا بخرێتەڕوو، سەرچاوەیەك كە قسەی بۆ "شەفەق نیوز" كردووە، وردەكاریی داخوازییەكانی كوردانی سووریای ئاشكرا كردووە و بڕیارە لە رۆژانی داهاتوودا پڕۆژەكە بۆ رای گشتیش ئاشكرا بكرێت.
بەپێی ئەو سەرچاوەیە، پڕۆژەكە 25 خاڵە و لە بابەتە سەرەكییەكانی باس لەوە كراوە، سووریا بەو پێیەی دەوڵەتێكی فرە نەتەوەیی و ئاینییە، دەبێت رەنگدانەوەی هەمووانی تێدابێت و هەمووان تێیدا یەكسان بن.
داوای ئەوە كراوە سیستمێكی حوكمڕانیی پەرلەمانی تێكەڵاو كە فرەیی سیاسی و جیاكردنەوەی دەسەڵاتەكان پەسند دەكات. داوا كراوە جێبەجێكردنی لامەركەزی بۆ دەستەبەركردنی دابەشكردنی دادپەروەرانەی دەسەڵات و سامان. لەگەڵ نوێنەرایەتیكردنی هەمەجۆریی نیشتمانی و كولتووری لە ناو و ئاڵا و سروودی نیشتمانی وڵاتدا.
هاوكات لە پڕۆژەكەدا باس لە بێلایەنی دەوڵەت بەرانبەر بە ئاینەكان كراوە و لە ناویاندا بە فەرمی ناساندنی ئاینی ئێزیدی. هەروەها ناسنامەی سووریا دەبێت تایبەتمەندییەكانی هەموو پێكهاتەكان لەبەرچاو بگرێت، رێزی ژن وەك مرۆڤێكی ئازاد و سەربەخۆ بگرێت.
"هەڵوەشاندنەوەی ئەنجامی گۆڕانكاریی دیمۆگرافی و دەستەبەركردنی گەڕانەوەی ئاوارەكان، بەتایبەت لە ناوچە كوردنشینەكانی وەك عەفرین و سەرێ كانی و گرێ سپی و درێژكردنەوەی سەروەری دەوڵەت بەسەریاندا".
لە بواری نەتەوەییش باس لەوە دەكەن، پێویستیی ددانپێدانانی دەستووریبوونی نەتەوەیی كورد لە سووریا و دەستەبەركردنی مافەكانیان بەپێی ڕێككەوتننامە نێودەوڵەتییەكان كراوەتەوە. ئاماژەش بە یەكخستنی ناوچە كوردنشینەكان وەك یەكەیەكی سیاسی و ئیداری لە چوارچێوەی سووریایەكی فیدراڵیدا كراوە. هاوكات ددانپێدانانی دەستووری بە مافەكانی كورد لە سیاسەت و ڕۆشنبیری و ئیدارەدا، هاوكات پرسی ئۆتۆنۆمی ئیداری بۆ ناوچەكان و پارێزگاكان، بەپێی كولتوور و نەتەوەكان دەستەبەر بكرێت.
وەڵام بدەوه