لە بانگەوازێكدا، ئەنجوومەنی باڵای ئیسلامیی عەلەوی لە پارێزگای لازقییەی سووریا، داوا لە وڵاتانی عەرەبی دەكا، هەرچی زووە كار بۆ ڕاگرتنی كۆمەڵكوژیی سەریان بكەن و ئەوان گرێدراوی نەتەوەی عەرەبن و ئەو ناسنامەیەیان لێ جیا ناكرێتەوە.
ئەمڕۆ شەممە 8/3/2025، ئەنجوومەنی باڵای ئیسلامیی عەلەوی لە پارێزگای لازقییەی سووریا، لە بانگەوازێكدا، ڕایگەیاند: ئێمە ڕۆڵەكانی هۆزی عەلەویین لە سووریا، ئەم بانگەوازە بەپەلەیەتان ئاڕاستە دەكەین، پەیامی ئەوە دەردەبڕین كە پابەندبوونی قووڵمانی بە عەرەببوونەوە هەیە، كە بەشێكین لێی و لە ناسنامەی ئێمە جیا ناكرێتەوە. ئێمە هەمیشە شانازی بەوەوە دەكەین بگەڕێینەوە بۆ ئامێزی عەرەبی، دوای ئەوەی بەهۆی سیاسەتی رژێمی سووریاوە ناچار بووبووین لێی دوور بكەوینەوە و بەرەو ژێر هەژموونی فارسیی ئێرانی بچین.
لە بەشێكی بانگەوازەكەدا، ڕایانگەیاندووە: ئێمە ئەمڕۆ خۆمان لەژێر هێرش و پێشێلكاریی هەڕەمەكی و كۆمەڵكوژیی زۆرەملێدا دەبینینەوە لەلایەن گرووپە چەكدارەكانی فەرمانڕەوای ئێستەی سووریاوە لەژێر باڵ و ناوی جیاواز، ئەم هێرشانە هەڕەشە لە بوون و مافە سەرەكییەكانمان دەكا، كە بەشێكی گرێدراوی سووریا و عەرەبین.
ئەنجوومەنەكە، بانگەواز و داوا لە "براكانمان لە وڵاتە عەرەبیەكان و بە تایبەت وڵاتانی كۆمكاری عەرەبی دەكەین، بە شێوەیەكی خێرا بكەونە كار بۆ ڕزگاركردنمان، ئەویش لە ڕێی ناردنی چاودێرتانەوە بۆ دەركەوتن و بینینی ڕاستییەكان و وەستانی هێرشەكان كە دژی مرۆڤ لە ناوچەكانمان دەكرێ."
لە ڕاگەیاندراوەكەشیاندا هاتووە: ئێمە دەمانەوێ دەمودەست بە هانامانەوە بێن بۆ وەستانی ئەو خوێنڕشتن و كۆمەڵكوژییەی دژی ئێمە دەكرێ و دەیانەوێ لە نیشتمانمان كە سووریایە دابماڵرێین. هیوامان وایە دەنگمان بگاتە كۆمەڵگەی نێودەوڵەتی و كار بكەن بۆ پاراستنی مافەكانمان و مسۆگەركردنی مانەوە و سەلامەتیمان بكرێ.
وەڵام بدەوه