لە خانەوادەی ئەسەدەوە بێدەنگی شکێنرا

بۆ یەکەمجار لە دوای ڕووخانی ڕژێمی بەشار ئەسەد لە سوریا لە ٨ی کانوونی دووەم، ئەسما ئەسەد، هاوسەری سەرۆک کۆماری پێشووی سوریا، لە زنجیرە تویتێکدا لە تۆڕی کۆمەڵایەتی "X" قسەی کرد.

ئەکاونتە نوێیەکەی ئەسما ئەسەد لەلایەن حافز ئەسەدی کوڕی لە هەژماری تایبەتی خۆی لە تێلێگرام ئاشکرا کرا، کە پێشتر ڤیدیۆیەکی خۆی لە یەکێک لە شەقامەکانی مۆسکۆ بڵاوکردبووەوە.

ئەسەد جونیۆر نووسیویەتی: “ئەکاونتی خاتوو ئەسما ئەسەد لە پلاتفۆرمی ئێکس پێتان ڕادەگەیەنم ئەکاونتەکە دوور دەبێت لە سیاسەت، و ئامانجی ئەوەیە ناوەڕۆکێک پێشکەش بکات کە ڕەنگدانەوەی لایەنە جیاوازەکانی ژیان و چالاکییە مرۆییەکانیەتی.”

ئاماژەی بەوەشکرد: "هەموو ڕووداوێک چیرۆکی خۆی هەیە، هەر قۆناغێکیش نهێنی خۆی هەیە. ئامانج لێی وروژاندنی مشتومڕ نییە، بەڵکو ئەوەیە کە چیرۆکەکە وەک خۆی بگێڕێتەوە، دوور لە گرژی و تۆمەت. ئەوەی لە سێبەردا بوو، کاتی ئەوە هاتووە وەک خۆی بیگێڕێتەوە، ئەسما ئەسەد نووسیویەتی کە لە ماوەی ساڵانی ڕابردوودا هەمیشە بێدەنگ بووە سەبارەت بە پرسە سیاسییەکان، و لە داهاتوودا هیچ تێوەگلانێکی نابێت".

ئاماژەی بەوەشکرد، “دوای ماوەیەک لە بێدەنگی، کاتی ئەوە هاتووە کە جارێکی دیکە دەست پێبکەین، هیوا و گۆڕانکاری هەرگیز نەوستین، بۆیە با پێکەوە دەست پێبکەین”، جەختیشی لەوە کردەوە کە “سوریا بە هەموو جوانی و مێژووی دێرینەکەیەوە لە دڵماندا دەمێنێتەوە، هیوای سەلامەتی و خۆشگوزەرانی بۆ گەلەکەی دەخوازین، و ڕۆژانی خۆش بگەڕێنەوە بۆ پڕکردنەوەی هەموو گۆشەیەکی خاکە باشەکەی”.

ئەسما ئەسەد جەختی لەوە کردەوە کە “نیشتمان تەنها شوێنێک نییە، بەڵکو هەستێکە کە لە دڵدا نیشتەجێیە هەرچەندە دوور بین سوریا وەک جوانترین چیرۆک دەمێنێتەوە”.

لە درێژەی قسەکانیدا وتی: “هەموو کەسێک ڕێگای خۆی هەیە، هەندێک ڕێگاش هەرگیز هەڵبژاردەی من نەبوون، لێرەدا بیرکردنەوەکانم بەیەکەوە دەبەستمەوە، دوور لە هەر ناونیشانێکی تر، قۆناغگەلێک لە ژیاندا هەن کە نەسڕدرێنەوە، کە لەگەڵ هەموو وردەکارییەکانیدا لە یادەوەریدا گیریان خواردووە... ئایا کاتی ئەوە هاتووە کە هاوبەشی بکەم؟”