لە میانی دیدارێكی بەرپرسی دۆسیەی سووریا لە دیوانی سەرۆكایەتیی هەرێم و نوێنەرایەتیی ئەنجوومەنی نیشتمانیی كوردی سووریا لە هەرێمی كوردستان، بەرپرسی نوێنەرایەتییەكە سوپاسی سەرۆك بارزانی كرد بەهۆی پاڵپشتیی بەردەوامی لە دۆزی كورد لە سووریا.
لە دوای رووخانی رژێمی بەشار ئەسەد لە سووریا، ئیدارەی نوێی دیمەشق هەوڵی یەكخستنەوەی تەواوی وڵاتەكە و دانانی دەستوورێك و هەڵبژاردن و پێكهێنانی حكوومەتێكی بنكەفرەوان دەدات، بۆ ئەوەش داوای لە كورد كردووە خۆیان لەگەڵ ئیدارەی نوێ یەك بخەن، لەو ناوەدا سەرۆك بارزانی وەك مەرجەعی نەتەوەیی كورد، دەستی بە جموجۆڵێكی چڕ كردووە بۆ پاراستنی ناوچە كوردییەكان و چەسپاندنی مافەكانی كورد لە دەستووری نوێی ئەو وڵاتە.
ئەمڕۆ یەكشەم حەمید دەربەندی بەرپرسی دۆسیەی سووریا لە دیوانی سەرۆكایەتیی هەرێمی كوردستان سەردانی نووسینگەی نوێنەرایەتیی ئەنەكەسەی لە هەرێمی كوردستان لە هەولێر كرد و لە لایەن سەرۆك و ئەندامانی نوێنەرایەتییەكە پێشوازی لێ كرا.
لە دیدارەكە باسی چەند پرسێكی سیاسیی نێودەوڵەتی و ناوچەكە كران، بەتایبەتی دۆخی كورد لە سووریا، هەروەها سەرنج خرایە سەر ئەو بەربەستانەی پەناخوازە سوورییەكان لە هەرێمی كوردستان رووبەڕووی دەبنەوە و چارەسەركردنیان بە هاوئاهەنگی لەگەڵ دیوانی سەرۆكایەتیی هەرێم.
لەو دیدارە نوێنەرایەتیی ئەنەكەس لە هەرێمی كوردستان سوپاسگوزاری خۆیان بۆ سەرۆك بارزانی بەهۆی پاڵپشتی بەردەوامی لە دۆزی كورد لە سووریا دەربڕی.
وەڵام بدەوه