کەمێک پێش ئێستا فڕۆکەیەک کەوتە خوارەوە

میدیاکانی ئێران بڵاویانکردەوە، فڕۆکەیەکی جەنگی ئێرانی لە پارێزگای هەمەدانی ڕۆژئاوای ئەو وڵاتە کەوتەخوارەوە و تێكشاوە، بەڵام فڕۆكەوانەكان ڕزگاریان بوە.
ئاژانسی هەواڵی فەرمی ئێران،  ئەمڕۆ چوارشەممە بڵاویکردەوە، فڕۆکەیەکی جەنگی ئێرانی لە ڕۆژئاوای ئەو وڵاتە کەوتوەتە خوارەوە و فڕۆکەوانەکانیش پێش ئەوەی فڕۆكەكە بكەوێتە سەر زەوری و تێكبشكێت بە پەرەشوت بازیانداوە، ڕزگاریان بوە.

ئاژانسی هەواڵی میهر-یش بڵاویكردەوە، ئەو فڕۆكەكەی كە ئەمڕۆ لە ڕۆژئاوای ئێران تێكشاوە، فڕۆکەیەکی سەربازی بوە و لە شاری کەبودەرئاهەنگ کەوتوەتەخوارەوە.
ئاژانسی هەواڵی تەسنیم-ی نزیك لە سوپای پاسدارانی ئێرانیش بڵاویكردەوە، "فڕۆکەیەکی هێزی ئاسمانی سوپا لە کاتی ئەنجامدانی ئەرکێکی مەشق و ڕاهێنان لە پارێزگای هەمەدان توشی ڕوداوێک بو".

هەمزە ئامرایی، جێگری ئاسایشی سیاسی پارێزگاری هەمەدان هەواڵەكەی پشتڕاستکردەوە و ڕایگەیاند، "فڕۆکەیەکی سەربازی لە شاری کەبودەرئاهەنگ کەوتەخوارەوە، بەپێی بەدواداچونەکان شوێنی وردی ڕوداوەکە لە ناوچەی (شیرین سو کەبودەرئاهەنگ)ە، و خۆشبەختانە فڕۆکەوانەکان پێش ئەوەی کەوتنەخوارەوەکە ڕزگاریان بوە."
دەشڵێت، "هێشتا هۆکاری ڕوداوەکە نەزانراوە و خۆشبەختانە هیچ زیانێکی گیانی نەبوە، هەروەها ئەو فڕۆکە سەربازییە دو فڕۆکەوانی هەبوە کە بە سوکی برینداربون و گواستراونەتەوە بۆ یەکێک لە ناوەندە پزیشکییەکان".