سەرۆککۆماری تورکیا رایدەگەیێنێت، مکوڕن لەسەر لەنێوبردنی ئەو رێكخراوە تیرۆریستییانەی مەترسی بن بۆ سەر ئاسایشی تورکیا و سووریا. لەبارەی داعش و پەکەکەش دەڵێت، ''یان خۆیان چەک دادەنێن، یانیش لەگەڵ چەکەکانیان لە خاکی سووریا دەنێژرێن''.
رەجەب تەیب ئەردۆغان، سەرۆککۆماری تورکیا، رۆژی چوارشەممە، 25-12-2024، لە کۆبوونەوەی هەفتانەی فراکسیۆنی پارتەکەی لە پەرلەمانی تورکیا گوتارێکی پێشکێشکرد و چەند پرسێکی تاوتوێکرد.
ئەردۆغان ئاماژەی بە بوونی "مەترسیی داعش و پەکەکە/پەیەدە" لە سووریا کرد و گوتی، ''مکوڕین لەسەر لەنێوبردنی ئەو رێكخراوە تیرۆریستییانەی مەترسی بن بۆ سەر ئاسایشی تورکیا و سووریا. بکوژە دابەشکەرەکان، یان خۆیان چەک دادەنێن، یانیش لەگەڵ چەکەکانیان لە خاکی سووریا دەنێژرێن''.
ئەردۆغان گوتیشی، ''رێکخراوی تیرۆیستی و پاڵپشتیکارانی، مامەڵەیەکی هەر چۆنیان هەبێت، بە دڵنیاییەوە ئێمەش مامەڵەیەکمان هەیە، پشت بە خوا ژیرانە مامەڵە دەکەین و پلان و یاریی ئیمپریالیستەکان(هێزە داگیرکەرەکان) تێکدەدەین''.
سەرۆککۆماری تورکیا ئاماژەی بەوە کرد "پەکەکە کێشە دەخاتە نێوان تورک و کورد" و، گوتی، ''ئەو رێکخراوە تیرۆریستییە لەنێودەبەین کە هەوڵدەدات لەنێوان ئێمە و خوشک و برا کوردەکانمان دیوارێک لە خوێن دروست بکات''.
لەبارەی داعشیشەوە گوتی، ''داعش نەک هەر بە تەنیا بۆ وڵاتانی رۆژئاوا، بۆ سووریا، بۆ عێراق، بۆ ئێمەش سەرچاوەیەکی مەترسییە و دەبێت لەنێوببرێت. ئێمە تاکە هاوپەیمانی ناتۆین کە رووبەڕووی ئەو پێکهاتە دڕندەیە بووینەوە. بۆیە لەم بابەتە کەس ناتوانێت وانە بە ئێمە بدات و سنوورمان بۆ دابنێت''.
وەڵام بدەوه