لەگەڵ نزیكبوونەوە لە رووخانی رژێمی بەشار ئەسەد، چەکدارانی ئۆپۆزسیۆنی سووریا توانییان بچنە ناو زیندانی سەیدنایا و هەموو زیندانییەکانیان ئازاد كرد.
ئەم زیندانە، کە بە ناوبانگی خراپی، وەک یەکێک لە خراپترین شوێنەکانی پێشێلکاریی مافی مرۆڤ لە سەردەمی ڕژێمی سووریادا ناسراوە، لەم دواییانەدا بووەتە جێی باسی میدیاکان و تۆڕە کۆمەڵایەتییەکان. ڤیدیۆگەلێک لە تۆڕە كۆمەڵایەتییەكان بڵاو بوونەتەوە و بەشێک لەو ترسە پیشان دەدەن، کە لەپشت دیوارەکانییەوە شاردرابووەوە.
یەکێک لەو ڤیدیۆیانە، ئامێرێکی ترسناکی پیشان دا، کە وەک پرێسێکی گەورە وایە، کە دەتوانێت لەشی مرۆڤ بهاڕێت و بیکاتە پارچە، بۆ ئەوەی بەئاسانی بگوازرێتەوە بۆ زبڵدان.
هەروەها لەناو زیندانەکەدا پەتی سووری هەڵواسین دۆزرایەوە، کە پشتڕاستکەرەوەی چیرۆکی ڕزگاربوانە سەبارەت بە لەسێدارەدانە بەکۆمەڵەکان، کە لەوێ ئەنجام دراون.
لە ڤیدیۆیەکی دیكەدا، ژمارەیەک هاووڵاتی دەبینرێن، کە هەوڵ دەدەن دیوارە کۆنکرێتییە گەورەکان بشکێنن، بە هیوای گەیشتن بە دەروازە نهێنییەکانی ژێر زەوی.
لە تۆمارێکی ڤیدیۆییدا، یەکێک لە چەكدارەكانی ئۆپەراسیۆن دەڵێت: "هەوڵ دەدەین بگەینە دەروازە نهێنییەکان. ئەو دەرگایانە جووڵاون و تەنیا زیندانەوانەکان شوێنەکانیان دەزانن. لەپشتیانەوە ناوچەی سوور هەیە، ئەو شوێنەی، کە هەزاران ئۆپۆزسیۆن و كەسانی سیاسی تێیدا زیندانی كراون."
ئەندامەكەی ئۆپۆزسیۆن دەشڵێت: “ئەم ناوچەیە نەک تەنیا بە شێوەیەکی ئەلیکترۆنی پارێزراوە، بەڵکوو بە بڕێکی زۆر خۆڵ دەورە دراوە و لە قووڵاییەکدایە، کە دەگاتە پێنج نهۆم لەژێر زەوی، کە گەیشتن پێی زۆر دژوارە.”
بەپێی راپۆرتێكی (ئەلزەمان)، زیندانی سەیدنایا، کە لە هەشتاکاندا دروست کراوە، پێشتر لەلایەن ڕێکخراوی لێبوردنی نێودەوڵەتییەوە وەک (قەسابخانەی مرۆیی) وەسف کراوە، ئەو زیندانەی، کە رژێمی سووریا بە بێدەنگی خەڵکەکەی تێدا سەربڕیوە.
زیندانەکە لەسەر گردێک هەڵکەوتووە، کە دەڕوانێتە سەر شارۆچکەی سەیدنایا، کە نزیکەی 30 کیلۆمەتر لە باکووری دیمەشقی پایتەختەوە دوورە.
زیندانەکە لە دوو بینای سەرەکی پێکهاتووە، بینای سووری کۆن و بینای سپیی نوێ، ڕووبەرەکەی نزیکەی 1.4 کیلۆمەتری چوارگۆشەیە، کە هەشت ئەوەندەی ڕووبەری یاریگا نێودەوڵەتییەکانی تۆپی پێیە بەیەکەوە.
وەڵام بدەوه