سەرۆكی حكوومەتی هەرێمی كوردستان بەرێز مەسرور بارزانی گەیشتە بەحرەین

سەرۆكی حكوومەتی هەرێمی كوردستان گەیشتە شانشینی بەحرەین و ڕایدەگەیەنێت: "بۆ تاوتوێکردنی هاریکاری و ئاسایشی ناوچەکە، سەردانی شانشینی بەحرەین دەکەم."

كەمێك پێش ئێستا (دووشەممە 9/12/2024)، مەسرور بارزانی، سەرۆكی حكوومەتی هەرێمی كوردستان، گەیشتە (مەنامە)ی پایتەختی شانشینی بەحرەین و پێشوازییەكی گەرمی لێ كرا.

ئەمڕۆ، سەرۆكی حكوومەتی هەرێمی كوردستان، لە هەژماری تایبەتیی خۆی، لە تۆڕی كۆمەڵایەتیی (ئێكس) بڵاوی كردەوە: "بۆ تاوتوێکردنی هاریکاری و ئاسایشی ناوچەکە، سەردانی شانشینی بەحرەین دەکەم."

سەرۆكی حكوومەت دەشڵێت: "پێویستمان بە گفتوگۆ و پەرەپێدانی دۆستایەتییە لەم کاتە پڕ لە تەنگژە و نادڵنیاییەدا."

ئەمڕۆ، سەرۆكی حكوومەت بە سەردانێکی فەرمی بەرەو (مەنامە)ی پایتەختی شانشینی بەحرەین بەڕێ کەوت، ئامانجی سەردانەکە، پتەوکردنی پەیوەندییە دووقۆڵییەکانی نێوان هەرێمی کوردستان و بەحرەین و تاوتوێکردنی دوایین پێشهاتەکانی ناوچە و ڕۆژهەڵاتی ناوەڕاستە.

سەرۆکی حکوومەت لە سەردانەکەیدا کە دوو ڕۆژ دەخایەنێت، لەگەڵ بەرپرسانی باڵای بەحرەین کۆ دەبێتەوە و گفتوگۆ لەبارەی پرسە گرنگەکانی ناوچەکە، بە تایبەتی گۆڕانکاری و پێشهاتەکانی سووریا دەکات.

ئەم سەردانە بەشێکە لە هەوڵە بەردەوامەکانی سەرۆکی حکوومەت بۆ پەرەپێدان و بەهێزترکردنی پەیوەندییە نێودەوڵەتییەکانی هەرێمی کوردستان، بە تایبەتی لەگەڵ وڵاتانی کەنداو.