ئەبو عەلا وەلائی ئەمینداری گشتیی لیواكانی سەید شوهەدا ڕای گەیاند، ڕەجەب تەیب ئەردۆغان سەركێشی بەئایندەی سیاسیی خۆیەوە دەكات و دەشڵێت، "سووریا نابێتە زبڵدانێك بۆ پاشەڕۆكانی توركیا و ئیسرائیل".
وەلایی لە پۆستێكدا لەسەر پلاتفۆرمی "X”نووسیویەتی، حكوومەتی توركیا سوورە لەسەر ئەوەی خەڵكەكەی كە بەدەست تێكچوونی توندی ئابوورییەوە دەناڵێنن، بخاتە ناو جەنگێكی دۆڕاوەوە كە ئابوورییەكەی بەرگەی ئەو جۆرە ململانێیانە ناگرێت".
ئەمینداری گشتیی لیواكانی سەید شوهەدا دەشڵێت: هەرچەند داڕمانی دراوی توركیا خەریك بوو ئابووریی توركیا بەرەو هەڵدێر بەرێت، بەڵام زیادبوونی ئاڵوگۆڕی بازرگانیی لەگەڵ عێراق، ڕۆڵی هەبوو لە كەمكردنەوەی قەیرانەكە و ڕزگاركردنی ئابووریی ئەو وڵاتە.
ئەبو عەلا ئاماژەی بەوەش كردووە، ئەردۆغان پێی وایە سیاسەتەكانی ئێستەی، وای لێ دەكات بتوانێت لە پڕۆژەی ڕۆژهەڵاتی ناوەڕاستی نوێدا جێگەیەك بەدەست بهێنێت، كە لەگەڵ نەتەنیاهۆی هاوپەیمانەكەیدا گرێی دەدات.
وەلائی جدووپاتی لەوەش كردووەتەوە، ڕژێمی توركیا و قەوارەی ئیسرائیل دەبێت درك بەوە بكەن كە سووریا، جارێكی تر نابێتە گۆڕەپانێك بۆ بەڕێوەبردنی قەیرانە مرۆییەكانیان.
وەلائی هەڕەشە دەكات و دەڵێت، ئێمە رێگە نادەین پلانەكانی توركیا و ئیسرائیل لە سووریا جێبەجێ بكرێت.
لیواكانی سەید شوهەدا بەشێكن لە هێزە چەكدارەكانی حەشدی شەعبی و وەلائیش یەكێكە لە توندترین كەسە دیارەكانی ناو گرووپە چەكدارەكانی حەشد.
وەڵام بدەوه