ئێران دووپات لەوە دەكاتەوە كە ئەوجارە وەك هێرشەكەی نیسانی رابردوو زانیاری لەبارەی هێرشەكەی بە وڵاتان نادات، كتوپر و لەماوەی چەند رۆژێك لەگەڵ میلیشیاكانی وەڵامێكی توندی مووشەكی و درۆنی ئیسرائیل دەداتەوە و تەلئەبیبیش لەناو ئامانجەكانیەتی، لەوكاتەی سوپای ئیسرائیل دەڵێت، ئامادەین بۆ هەموو سیناریۆكان.
سەرچاوەیەكی ئاگەدار لە ئیسرائیل رای گەیاند كە ئەو وڵاتە سوپاكەی خستووەتە حاڵەتی ئەوپەڕی ئامادەسازی، ئەوەش دوای زانیارییە هەواڵگرییەكان و بوونی ئاماژە بەوەی ئێران و حزبوڵا خۆیان تەواو ساز داوە بۆ هێرشكردنە سەری، وەك رۆژنامەی "ویڵ ستریت جۆرناڵ"ی ئەمەریكی باسی كردووە، بەڵام سەرچاوەكە نازانێت ئاخۆ هێرشەكە زۆر نزیكە یان نا.
بەپێی زانیارییەكان ئێران چەند هەنگاوێكی بۆ ئامادەكردنی سیستمی مووشەك و درۆنەكانی وەرگرتووە بەهاوشێوەی هێرشەكەی لە مانگی نیسانی رابردوو بۆ سەر ئیسرائیل، وەك بەرپرسانی ئیسرائیلی و ئەمەریكی بە ماڵپەڕی "ئەكسیوس" یان گوت، بەڵام دووپاتیان كردەوە كە بە كاتی هێرشەكە نازانن.
باراك رافید، رۆژنامەوانی ئیسرائیلی لە بەرپرسێكی باڵای وڵاتەكەی گواستەوە كە ئێران ئامادەسازییەكی گەورەی بەهاوشێوەی هێرشەكەی پێشووی بۆ سەر ئیسرائیل كردووە، سیستمی مووشەكی و درۆنی ئامادە كردووە.
لای خۆیەوە ئەمڕۆ دووشەم جەنەراڵ پاتریك رایدەر، گوتەبێژ بەناوی وەزارەتی بەرگریی ئەمەریكا رای گەیاند كە وڵاتەكەی بۆ وەڵامدانەوەی هەر سیناریۆیەك هەڕەشە لە ئیسرائیل بكات ئامادەیە، ئێمە بۆ وەڵامدانەوەی هەر سیناریۆیەك لەدژی ئاسایشی ئیسرائیل و بەرژەوەندییەكانمان بۆ ئێران و میلیشیاكانی ئامادەین، بۆ ئەو مەبەستەش بەبەردەوام چاودێریی پەرەسەندنەكانی رۆژهەڵاتی ناوەڕاست دەكەین، هەوڵ دەدەین ئاڵۆزییەكان كەم بكەینەوە و چەندان هەنگاومان بۆ بەهێزكردنی ئیسرائیل و ئامادەسازی بۆ بەرگری لێكردنی وەرگرتووە.
وەڵام بدەوه