ئیسرائیل بڕیاری کۆتایی داوە

ئیسرائیل هەڕەشەی هێرشکردنە سەر باشووری لوبنان دەکات ئەگەر حیزبوڵڵا هێرشەکانی بۆ سەر پێگەکانی ئیسرائیل ڕانەگرێت، لەبەرامبەردا حیزبوڵڵای لوبنانیش تاکە مەرجی بۆ ڕاگرتنی هێرشەکانیان بۆ سەر ئیسرائیل ڕاگرتنی شەڕی غەززەیە، بۆ هەموو ئەگەرێکیش ئامادەن. ڕیاز قەهوەچی، سەرۆکی ناوەندیی ڕۆژهەڵاتی ناوەڕاست و کەنداو بۆ شرۆڤەی سەربازی پێی وایە، دۆخی باشووری لوبنان وەکو ئەوەی ئێستا هەیە بەو شێوەیە دەمێنێتەوە، ئیسرائیل ئامادە نییە بەرەی شەڕ فراوان بێت بۆ لوبنان، ئیسرائیل و حیزبوڵڵا وەکو ئێستا بەردەوام دەبن لە شەڕی دەروونی، لەگەڵ ئەوەشدا گوشار و جموجوڵەکان لەناوخۆی ئیسرائیل بۆ فراوانکردنی بەرەکانی جەنگ بەردەوام دەبن: محەمەد یەزبک سەرۆکی دەستەی شەرعی حیزبوڵڵا دەڵێت: ئاموس هۆکستین، نێردەی ئەمریکا داوای لێکردوون گوشار لە حەماس بکەن دەستپێشخەرییەکەی ئەمریکا بۆ ڕاگرتنی جەنگ قبووڵ بکەن، بەپێچەوانەوە ئیسرائیل ناچار دەبێت بەرەکانی جەنگ فراوان بکات، وەڵامی حیزبوڵڵاش ئەوە بووە کە دەستیان دەگات بە هەموو شوێنێکی ئیسرائیل، دەیانگەڕێننەوە بۆ سەردەمی چاخی بەردین، بۆ هەموو ئەگەرێکیش ئامادەن، بەهیچ شێوەیەک هێرشەکان لە باشووری لوبنانەوە بۆ سەر ئیسرائیل ڕاناگیرێن تا هێرشەکان بۆ سەر غەززە ڕانەگیرێن.