دەسەڵاتدارانی توركیا رایان گەیاند، لەمەودوا هاووڵاتییانی عێراق دەتوانن لە رێگەی ئەلیكترۆنییەوە فۆرمێك پڕ بكەنەوە و داواكاری پێشكەش بكەن بۆ وەرگرتنی ڤیزەی توركیا.
ئەمڕۆ پێنجشەم 18ی كانوونی دووەمی 2024، تۆڕی هەواڵی "مینا ئێف ئێن" بڵاوی كردووەتەوە، توركیا لینكێك دەكاتەوە بۆ ئەو هاووڵاتییە عێراقییانەی كە نیازی گەشتی توركیایان هەیە بە رێگەی وشكانی و ئاسمانی لە بری ئەو رێكارە كاغەزییانەی كە ئێستە لەلایەن هاووڵاتییانی عێراقییەوە دەنرێت بۆ دەستخستنی ڤیزەی توركیا.
لە هەواڵەكە ئەوەیش هاتووە، هەموو ئەوانە كە بە مەبەستی گەشت، بازرگانی و گواستنەوە دەیانەوێ بچن بۆ توركیا، دەتوانن لە رێگەی لینكی ئەلیكترۆنییەوە ڤیزەی توركیا دەستبخەن.
تۆڕی هەواڵی " مینا ئێف ئێن" بێ ئاماژەدان و بڵاوكردنەوەی لینكی پێشكەشكردنی ڤیزەی گەشتیاری بۆ توركیا، روونی كردووەتەوە كە لە ئێستەدا لینكەكە كارایە و بە شێوەیەكی سنووردار كار لەسەر لینكەكە دەكرێ وەك قۆناغی سەرەتایی و تاقیكردنەوە، ئەمەیش لە پێناو رزگار بوون لەو رێكارە كاغەزییانەی كە هاووڵاتییانی عێراقی دەیگرنە بەر بۆ وەرگرتنی ڤیزەی توركیا.
هیچ ئاماژەیەكیش بەوە نەكراوە كە نرخی وەرگرتنی ڤیزەكە یان پارەدانی ئەلیكترۆنی لە پرۆسەی پڕكردنەوەی فۆڕمی داخوازی ڤیزەی توركیا لە پرۆسەكە بوونی هەیە یاخود نا.
وەڵام بدەوه