ئەنجوومەنی وەزیرانی هەرێمی کوردستان بڕیارێك دەردەكات و بۆ بەرژەوەندیی هاووڵاتییان رێگە لە سێ بابەت دەگرێت.
بەپێی نووسراوێکی سكرتاریەتی ئەنجوومەنی وەزیران، كە لە 13ی6ی 2023، بۆ وەزارەتی ناوخۆ نێردراوە تیایدا ئاماژە بە بڕیارێكی ئەنجوومەنی وەزیران كراوە و جەخت لەسەر جێبەجێكردنی كراوەتەوە.
لە نووسراوەكەدا هاتووە: ئەنجوومەنی وەزیران بڕیاری دا بە راسپاردنی وەزارەتی ناوخۆ، بە هاوكاری و هەماهەنگیی وەزارەت و لایەنە پەیوەندیدارەكان، كە بەردەوام بن لە رێكارەكانی بەرگرتن لە دیاردەكانی سیمكارتی بێ خاوەن، ئۆتۆمبێلی بێ بەرایی و تۆمارنەكراو و چەكی بێ مۆڵەت."
ئەنجومەنی وەزیران جەختی كردووەتەوە: "ئەو بڕیارە لەپێناو كەمكردنەوەی تاوان و توندوتیژی و پاراستنی ژیان و سەلامەتی و بەرگرتن لە بەركارهێنانیان بۆ تاوانكاری و هەراسانكردنی هاووڵاتییان و سەلامەتی و دووربوونیانە لە هەڕەشە.
ئەوەش خراوەتە ڕوو، كە بڕیارەكە كاری پێویستی بۆ بگیرێتەبەر و لە بەرەوپێشچوونی جێبەجێكردنی بڕیارەكە ئاگادارییان بكەنەوە. سەرچاوەیەك لە وەزارەتی ناوخۆ راگەیاند: بۆ بابەتی چەكی بێ مۆڵەت چەندین رێكار گیراونەتەبەر، كە هەموویان بۆ كۆنتڕۆڵكردنی ئەو بابەتەیە، بۆ ئۆتۆمبێلی تۆمار نەكراو و سیمكارتی بێ خاوەنیش رێكاری خۆمان هەیە و ئامانجمانە تاوان و دیاردەی توندوتیژی كەم بكەینەوە و بڕیارەكەی ئەنجوومەنی وەزیران وەكوو خۆی جێبەجێ دەكەین.
سەرچاوەكە ئاماژەی بەوەش دا، لە رۆژانی داهاتوودا بۆ جێبەجێكردنی بڕیارەكە چەندین رێكار دەگیرێنە بەر.
وەڵام بدەوه