ئەندامێكی ئەنجومەنی سەركردایەتیی پارتی دیموكراتی كوردستان رایدەگەیەنێت، دادگای فیدراڵی دەرفەتی بە لایەنەكان داوە لەنێوخۆیاندا بگەنە رێككەوتن و كوردیش كێشەی لەگەڵ ھیچ لایەنێكدا نییە و بەپێی داواكاریی خۆی بەشداری لە حكوومەتی داھاتوودا دەكات.
دكتۆر ئاراس حەسۆ میرخان، بۆ ماڵپەڕی فەرمیی پارتی دیموكراتی كوردستان گوتی، دادگای فیدراڵی بڕیاری داوە دانیشتن لەبارەی دەستەی سەرۆكایەتیی پەرلەمان دوابخرێت، بۆ ئەوەی لایەنەكان لەنێوخۆیاندا بگەنە رێككەوتن، چونكە سەدرییەكان خۆیان یەكلا كردووەتەوە لە پێكھێنانی حكوومەت، بەڵام ئایا لایەنەكانی دیكەی شیعە بەشداری لە حكوومەتی تازەدا دەكەن یاخود نا، ئەوەیان یەكلا نەبووەتەوە.
میرخان گوتیشی: "كورد كێشەی لەگەڵ ھیچ لایەنێكدا نییە، ئەوەی داواكاریی كورد قبوڵ بكات، كورد بەشداری لە حكوومەتدا دەكات و كێشەی نابێت، بۆیە بەپێی داواكاریی خۆمان بەشداری دەكەین".
دەشڵێ: "ھەوڵەكان بەردەوامن بۆ ئەوەی كورد لە بەغدا یەكڕیز بێت و پارتی كاری جیددی لەوبارەیەوە دەكات، پەیوەندیی یەكێتی و پارتیش نەپچڕاوە و بەردەوامە، تەنھا جارێ كۆبوونەوە نەكراوە لە نێوان ھەردوولا".
وەڵام بدەوه