بڕی 350 ملیۆن دینار بۆ هاوکاریی و یارمەتیدانی زیانلێکەوتووانی لافاوەکەی هەولێر، لەلایەن ئیدارەی سەربەخۆی سۆران ڕاده‌ستی پارێزگاری هه‌ولێر كرا

سەرلەبەیانى ئەمڕۆ سێشەممە 2022.1.4، ئومێد خۆشناو، پارێزگارى هەولێر، لەدیوانى پارێزگا، پێشوازی لە هەڵگۆرد شێخ نەجیب، سەرپەرشتیاری ئیدارەی سەربەخۆی سۆران و شاندێکى یاوەرى کە پێکهاتبوو لە قائیمقامانى مێرگەسۆر، چۆمان، ڕەواندوز، سۆران کرد.
لەدیدارەکەدا، سەرپەرشتیاری ئیدارەی سەربەخۆی سۆران ڕایگەیاند: "ماوەى چەند ڕۆژێکە لەڕیگەى ژمارە حسابێکى بانکییەوە کەمپینێکمان لە سۆران، ڕەواندز، مێرگەسۆر، چۆمان لەژێرناونیشانى ''ئازارەکانى ئێوە، ئازارى ئێمەیە'' ڕاگەیاند، ئەمڕۆش هاتووین ئەو هاوکاریی و کۆمەکانەى لەو کەمپینە کۆکراوەتەوە بگەێنین بە لێقەوماوانى لافاوەکەى هەولێر کە بڕەکەى (350) ملیۆن دینارە".
لەلایەن خۆیەوە پارێزگارى هەولێر، وێڕاى بەگەرمى بەخێرهێنانى سەرپەرشتیاری ئیدارەی سەربەخۆی سۆران و شاندى یاوەرى، دەستخۆشى لەو هەڵوێستە مرۆییەى ئەوان کرد و سوپاسى بەشدارى هاوڵاتیانى سۆران، ڕەواندز، مێرگەسۆر، چۆمانى کرد بۆ هاریکارى و یارمەتیدانى زیانلێکەوتووانى لافاوەکەى هەولێر و ڕایگەیاند: "ئەم هەڵوێستە نیشتیمانییەتان بۆ ئێمە گرنگیی خۆی هەیە و پەیامێکى گەورە و لەبیرنەکراوە و مایەى شانازییە".