پاش نیوەڕۆی ئەمڕۆ هەینی، ژمارەیەک عەرەبی هاوردە مەڕ و ئاژەڵیان بردووەتە نێو گوندی پەلکانە لە سنووری شارەدێی سەرگەڕان لە رۆژئاوای کەرکووک و دواتر هێرشیان کردووەتە سەر جووتیارانی کوردی دانیشتووی گوندەکە و شەڕ لە نێوانیاندا دروستبووە.
فەرهاد حەسەن، دانیشتووی گوندی پەلکانە راگەیاند، عەرەبە هاوردەکان سەرەتا لە دوورەوە راوەستابوون و مەڕ و ماڵاتیان ناردە نێو گوندەکەوە و خەڵکیان بێزار کرد، کاتێک ئێمە قسەمان لە دژی ئەو کارەیان دەکرد، ئەوانیش بە دار و ئاسنەوە هێرشیان هێنا و شەڕ لە نێوانمان دروستبوو.
ئەو هاونیشتمانییە دەڵێت، "خەڵکی گوندەکە پێکەوە رووبەڕووی عەرەبە هاوردەکان بووینەوە و توانیمان پێکەوە لێیان بدەین و لە گوندەکە هەڵبێن، بەڵام بە ماوەیەکی کەم هێزێکی زۆری سوپای عێراق لە گوندەکە بڵاوەیان پێکرا و دەستیان بە لێکۆڵینەوە کردووە.
بە گوتەی فەرهاد حەسەن، هێزەکەی سوپای عێراق کەسی دەستگیرنەکردووە، بەڵام هێزی زۆریان هێناوەتە گوندەکە و لێکۆلینەوە لەگەڵ جووتیارانی کورد دەکەن.
گوندی پەلکانە دەکەوێتە رۆژئاوای کەرکووک و سەر بە شارەدێی سەرگەڕانە، لە دوای رووداوەکانی 16ـی ئۆکتۆبەری 2017ـەوە عەرەبی هاوردە هەوڵی دەستبەسەرداگرتنی زەویی جووتیارانی کورد دەدەن.
وەڵام بدەوه