لەسەر فەرمانی حکوومەتی ھەرێمی کوردستان بە ھەزاران کەمئەندامی ھەرێمی کوردستان لەلایەن لیژنەی پسپۆڕەوە پشکنینی کەمئەندامییان بۆ کراوە و، بەرپرسێکی وەزارەتی کاریش دەڵێت، حکوومەت بڕیاری داوە مووچە بۆ کەمئەندامانی نوێ دابین بکات.
تووران خدر، بەڕێوەبەری چاودێریی کۆمەڵایەتیی ئیدارەی سەربەخۆی سۆران، ڕاگەیاند: لە ساڵی ڕابردووەوە حکوومەتی ھەرێمی کوردستان فەرمانی دەرکردووە بۆ تۆمارکردنی کەمئەندامی نوێ، ئەوەیش دوای ئەوەی لە ساڵی ٢٠١٤ بەدواوە تۆمارکردنی کەمئەندام ڕاگیرابوو بەھۆی قەیرانی داراییەوە، لە مانگی ئابی ڕابردووەوە لە ئیدارەی سەربەخۆی سۆران لیژنەی پشکنین پێک ھاتوون بۆ وەرگرتنی کەمئەندامی نوێ و دیاریکردنی ڕێژەی کەمئەندامییان.
ئەو بەرپرسەی وەزارەتی کاروباری کۆمەڵایەتی گوتی: "ھەزاران کەس لە مووچەی مانگانە سوودمەند دەبن و زۆربەی کەمئەندامانیش بڕیاری حکوومەت دەیانگرێتەوە، تەنیا لە ئیدارەی سەربەخۆی سۆران و ھەر چوار قەزاکەی زیاتر لە یەک ھەزار و ٥٠٠ کەمئەندام مووچەیان بۆ دابین دەکرێت.
لەبارەی وادەی خەرجکردنی مووچەکانیان تووران خدر ڕوونی کردەوە: "پێشتر حکوومەت بڕیاری لەسەر دەرکردووە و فەرمانی بە وەزارەتی کاروباری کۆمەڵایەتی کردووە بۆ تۆمارکردنی کەمئەندامی نوێ، ئەوەیش بە مووچەوە دەبێت، ئێمە تەنیا پرۆسە ئیدارییەکەی بەڕێوە دەبەین و ناوەکان ڕەوانەی وەزارەت دەکرێن و دواتر ئەوان بڕیار لەسەر کاتی مووچە دەدەن.''
وەڵام بدەوه