وەزیری شارەوانی و شاندێكی یونیسێف پرۆژەكانی ئاوی خواردنەوە و وشكەساڵی تاوتوێده‌كه‌ن

ئەمڕۆ دووشەممە (13ی كانوونی یەكەمی 2021) ساسان عەونی وەزیری شارەوانی و گەشتوگوزار، پێشوازی لە دكتۆر عەلی خەتیب بەڕێوەبەری گشتیی ئاو و ئاوەڕۆ لە ئۆفیسی یونیسێف لە عێراق و شاندێكی یاوەری كرد، كە پێكهاتبوون لە بەڕێوەبەرانی ئاو و ئاوەڕۆ لە ئۆفیسەكانی هەولێر و سلێمانی و دهۆكی یونیسێف. 
لە دیدارەكەدا كە ئەندازیار ئاری ئەحمەد بەڕێوەبەری گشتیی ئاو و ئاوەڕۆی وەزارەتی شارەوانی و گەشتوگوزار ئامادەی بوو، چەند تەوەرێكی گرنگ و ستراتیژیی تایبەت بە وشكەساڵی و كاریگەرییەكانی لەسەر كەمئاوی و پەرەپێدانی سێكتەری ئاو بە گشتی و جێبەجێكردنی پرۆژەی ئاوی خواردنەوە لە هەرێمی كوردستان تاوتوێ كران.
ساسان عەونی وەزیری شارەوانی و گەشتوگوزار وێڕای بەخێرهاتنی شاندەكە هاوكات سوپاسگوزاریی حكوومەتی هەرێمی كوردستان و وەزارەتی شارەوانی و گەشتوگوزاری گەیاندە شاندەكەی یونیسێف لە عێراق لە پای ئەو هاوكاری و پرۆژانەی پێشتر لە هەرێمی كوردستان لە بواری پرۆژەی ئاو و دابینكردنی ئاوی خواردنەوە بۆ كەمپەكان جێبەجێیان كردووە، هەروەها پەرەپێدانی هەماهەنگی و هاوكارییەكانی بە پێویست و گرنگزانی بۆ زیاتر بووژانەوەی سێكتەرە خزمەتگوزارییەكان لە هەرێمی كوردستان.
ئۆفیسی یونیسێف لە عێراق دەیانەوێت لە بابەتی وشكەساڵیدا هاوكاری حكوومەتی هەرێمی كوردستان بكەن و بۆ ئەو مەبەستەش چەند پرۆژەیەك لە بواری ئاوی خواردنەوە لە شاری هەولێر و سلێمانی و دوبز جێبەجێ دەكەن، وەزارەتی شارەوانی و گەشتوگوزاریش ڕوئیای خۆی لەبارەی ئەو بابەتەوە خستەڕوو و پێشوازی لە هەر جۆرە هاوكاری و جێبەجێكردنی پرۆژەیەكی یونیسێف دەكات بۆ خزمەتكردن و بووژانەوەی سێكتەرە خزمەتگوزارییەكان لە هەرێمی كوردستان.