پرۆژەیەکى نوێ لە سنورى شەقڵاوە دروست دەکرێت

بە گوژمەی زیاتر لە (40 ملیار دینار) دەست بەجێبەجێ کردنى پڕۆژەى دروستکردنی پڕۆژەی 2 بەرزە پردی سوڕانەوە و فراوانکردنی ڕێگای دەربەندی کۆڕێ- شەقڵاوە کراوە
بە مەبەستی لەنزیکەوە ئاگادار بوون لە چۆنیەتی بەڕێوەچوونی کارەکان، ئەمڕۆ شەممە 2022.12.31، ئومێد خۆشناو، پارێزگاری هەولێر، بە یاوەری مەسعود کاڕەش، جێگری پارێزگار و نزار مەلا غەفار، ئەندامی پەرلەمانی کوردستان و نوێنەرانی لقی24 سفینی پارتی و حامد ئیسماعیل، قایمقامی قەزایی پیرمام و هونەر نوری، بەڕێوەبەری گشتی ڕێگاو بانی هەولێر، پڕۆژەی دروستکردنی 2 بەرزە پردی سوڕانەوە و فراوانکردنی ڕێگای دەربەندی کۆڕێ- شەقڵاوەی بەسەرکردەوە، کە بەگوژمەی (40 ملیار و 128 ملیۆن و 91 هەزار دینار) لە سەر بوجەی حکومەتی هەرێمی کوردستان، بەشێوەی بەڵێدەرایەتی لەلایەن کاڤین گروپ دەست بەجێبەێکردنی کراوە و ماوەی تەواوکردنی پڕۆژەکەش (14) مانگە.
پارێزگاری هەولێر لە بەسەرکردنەوەکەیدا لە نزیکەوە لەگەڵ تیمی سەرپەرشتیاری پڕۆژەکە لە چۆنیەتی بەڕێوەچوونی کارەکان و پێداویستییەکانی کۆڵییەوە و  دەستخۆشى لە کرێکاران و ئەندازیارانی پڕۆژەکە کرد.
جێگەى باسە، پڕۆژەی دیزاینکردن و دروستکردنی دوو بەرزە پردی سوڕانەوە و فراوانکردنی ڕێگای دەربەندی کۆڕێ- شەقڵاوە، کە بەگوژمەی (40 ملیار و 128 ملیۆن و 91 هەزار دینار) لە سەر بوجەی حکومەتی هەرێمی کوردستان جێبەجێدەکرێ و لە ئێستادا لە22% کارەکانى بەکۆتاهاتووە، پێکهاتووە لە بەرزە پردی باشوور درێژی کۆنکرێتی 190 مەتر و بەرزە پردی باکوور بەدێژی کۆنکرێتی 95 مەتر کە کۆی گشتیی 20000م3 کۆنکرێتە، لەگەڵ فراوانکردنی ڕێگای کۆڕێ - شەقڵاوە، پڕکردنەوەی بەبڕی 110000م3 و بڕین بڕی 150000م3 و قیڕتاوکردن.